Barcelona-in hma an hruai zel

Spanish La Liga-ah Barcelona an kal zel a, Catalan club hian Pathianni zan khan khualmualah Villarreal chu 1-0 in an hneh - Pedri chuan inkhela goal awmchhun hi minute 18-naah a khung a, Barca boss hlui Quique Setién enkawlna hnuaia khel Villarreal-in a chhanletna tur an nei lo.

Pedri hian minute 18-naah inkhela goal awmchhun hi a khung a, Robert Lewandowski-a siamsak mawi zet chu Liverpool keeper hlui, kum 40 mi Pepe Reina venah a pet goal a ni. Pedri hian tun season inelna hrang hrangah goal sarih a khung tawh.

Barcelona-in hnehna an chan avangin table chung bera an dinhmun an sawhnghet lehzual sauh a, an hnuai chiaha awm Real Madrid aia an sanna chu point 11 ngawt a ni tawh a, match khatin an khel tam thung.

Villarreal khelmuala inkhelah hian yellow card pariat ngawt phawrh a ni a, Villarreal defensive midfielder Francis Coquelin chu minute 36-na lekah hliam vangin lakchhuah a ngai bawk.

FIFA Club World Cup nomawi chawi hlim Real hian CWC khelh vangin kartawpah league match an khel lo a, Nilaini zan dar 1:30-ah Elche an mikhual dawn - an chak chuan point riatin Barca nena an inkar an sawr zim leh thei ang.

La Liga inkhel ngaihven hlawh dangah Atletico Madrid chuan 1-0 in Celta Vigo an hneh a, Barca aṭanga Madrid khaw club pantu Memphis Depay chuan minute 89-naah chakna goal a khung - Dutch forward-in Atletico a pan hnua goal a khung hmasak ber a ni a, season thara Champions League khelh beiseina a nung zel.