Arsenal mualah Man City an lut dawn

Premier League nomawi inchuh boruak a sang chho mek a, zanin dar 1:00 hian Arsenal khelmual Emirates Stadium-ah Manchester City an lenglut dawn - league hmahruaitu an inthlak thut mai thei, inkhel a hmuhnawm ngei ngei dawn. Premier League final ti hiala chhal theih a ni.

Beisei phak baka season hmang ṭha Arsenal hi hmahruaitu an la ni a, mahse champion lai Manchester City hian match khata khel hnem chungin an inkarah point thum a awm, mikhual City an chak chuan hma hruaitu an inthlak ang.

Arsenal an chak erawh chuan hma an hruaina an sawhnghet thung dawn. Mikel Arteta naute hi tun hnaiah an che fuh tawk lo, an tan chuan zanin hi fiahna hautak leh pawimawh ber tura sawi theih a ni.

Haaland chiang lo?

Manchester City goal thun khawl Erling Haaland chu Aston Villa an hneh ṭumin half time-ah thlak a ni. Pep Guardiola chuan, "A hliam, chutih rualin goal mamawh vanglai ni se la chuan ka thlak lo mai thei," tiin a sawi zauh a, a dinhmun a chiang thei rih lo. Thawhlehni kha chuan Norwegian striker hian City training a zawm tawh.

Villa lakah khan 3-0 in hma an hruai fal tawh a, manager Pep tan chuan hliam nei Haaland lak chhuah kha thil tih awm tak a ni. Norway international hian tun season Premier League match 21 aṭangin goal 25 a khung thei, a inlan a nih chuan ven uluk a ngai dawn.

Haaland khel lo pawh ni se Man City hian Julian Alvarez an la nei tho a, mual sira khel thiam Riyad Mahrez leh Jack Grealish te an la nei bawk, goal khung kawngah chuan an buai lo tura ngaih a ni.

Tlarhma an ngaihtuah awm lo a, tun season kal laia Man City ṭhat tawk lohna lai chu an tlarhnung a ni. Villa an hneh ṭum pawhin goal an chhuah a, goal khat chauh an chhuah kha an vannei, zaninah an in ven uluk a ngai khawp ang.

Hun ṭha chu

Arsene Wenger chuan tun hnaia Arsenal khelh dan chuan beiseina a siam thu a sawi a, tun season a nih loh erawh chuan season thar lamah chuan Premier League champion nih a harsat sawt tur thu a sawi thung.

Wenger chuan, "A nihna tak sawi chuan kumin hi Arsenal tan ṭha bik niah ka ngai. Ka hmuh dan chuan season thar hi chu champion tura rinkai ber an ni lo ang, hetiang hun ṭha hi an bawhpelh loh hram ka beiseiin ka duhsak," a ti.

Arsenal hian FA Cup-ah Man City an hneh lo, chumi hnuah Everton leh Brentford an inhnehtawk pui, zaninah hian an tho chhuak a nih loh chuan nomawi beiseina a thamral zui mai thei, an chak a nih erawh chuan an dinhmun a ṭha khawp ang.

Arteta tan amah zirtirtu Guardiola hneh dan ngaihtuah chhuah a ngai tihna a ni a, thil awlsam a ni dawn lo. Man City hneh tur chuan Bukayo Saka leh Gabriel Martinelli ten an khelh ṭhat a ngai dawn, striker Eddie Nketiah mawhphurhna a sang dawn bawk.