Saints manager thar tur Marsch

Southampton chuan manager Nathan Jones thlakna tur an zawng a, Leeds United ban hnu Jesse Marsch chu an lalut dawn niin khawthlang media-ten an ziak. Thawhṭanni khan Marsch leh club aiawhte an inbia a, he thu i chhiar meuh chuan American manager hi Saints boss a ni tawh hial ang.

Premier League club hian manager atan Steven Gerrard leh Frank Lampard te pawh an bihchiang a, amaherawhchu player ropui ṭhinte hi manager an nih hnuah an sulhnu a ṭhat loh avangin Marsch lakluh hi an duh ta zawk.

Gerrard hi Rangers-ah hlawhtling mah se Aston Villa-ah beisei a pha chhunzawm lo a, ban a ngai hial. Lampard pawh a hming chherna Chelsea-in an ban hnuah Everton-ah kal lehin result ṭhat loh vang thoin an ban.

Kum 49 mi Marsch pawh hian Premier League-ah record a nei ropui chuang lo a, Elland Road-ah kum khat pawh a cham tling lo. Amaherawhchu Saints hian Marsch hi New York Red Bulls a enkawl laiin an enthla tawh a, an manager hlui Ralph Hasenhuttl nen an naute an khelhtir dan hmang a inan avangin American manager hi an duh thlu ta niin a lang.

Saints manager kal chhuak ta Jones khan match 14 chauh a enkawl hman a, Premier League-ah vawi khat chauh a chak avangin club thuneituten loh theih loin an ban. Tunah hian Southampton hi table mawngphahah an awm mek a, point 15 chauh an la hmuh avangin Marsch-a hmabak hi a harsa dawn hle.