TBL aia vannei zawk BCA

Mizoram Super League season kal laia match hnuhnawm bera chhal ngam chu Thawhṭanni zan khan kan hmu a, inkhel inhnehtawk leh hmuhnawm takah Zarkawt BCA chuan Khatla TBL lakah 100-98 in hnehna an chang.

R. Dengṭhuama Indoor Stadium-a inkhelah, champion tum ngam team pahnih hi ṭum 12 ngawt an inlehthal tawn, hmahruaitu an inthlak kual ngun dan chhutin inkhel en lo tan pawh an inhnehtawk tih a chiang a, inkhel entute vanneihna chu tualchhung basketball hmuhnawm an en kha a ni thung.

Hamrik hnuhnung ber a rik hma chiahin Khatla TBL tan Eddie Zaithanmawia chu a lay-up a, basket nei chiang tura ngaih ni mah se ball hi basket chhunga lut loin a sirah a kal, over time khelh ngai loin BCA an chak tlang theih phah.

Zarkawt BCA coach Lalrinfela (Mafela) chuan, "Inkhel tawp lamah free throw vawi ruk ngawt kan hlah, hun tawp dawna harsatna kha chu keimahni siam chawp a ni," tiin Vanglaini a hrilh a, hnehna chang mah se siamṭhat ngai lai an la ngah tih a sawi bawk.

TBL tan Mizo tlangval K. Lalthianghlima'n point 25 a nei a, tualchhung player zinga nei hnem ber niin BCA tana point 22 neitu Lalrinna Renthlei a hmuhnawm leh bawk - MSL team ṭha pahnih inel hi a la hmunawm zel dawn.

Thawhṭanni zan inkhel dangah Chanmari Vikings chuan Bungkawn LB Associates lakah 89-72 in hnehna an chang ve bawk a, team thar LB hian MSL bika an chakni hmasa ber tur an nghah rih a la ngai.