Signal Iduna Park-ah Chelsea fiahna

Zanin dar 1:30 hian Chelsea-in German club ṭha Borussia Dortmund hmachhawn turin Signal Iduna Park an tlawh dawn. London club hian neitu thar Todd Boehly hnuaiah sum ṭhahnem tak hmang mah se Champions League-ah chiah champion beiseina an nei tawh.

FA Cup leh League Cup-ah Blues hi vawi khat chauh khelin an tla nghal ve ve a, Premeir League-ah 10-naah an awm mek. Champions League-ah London club hian quarterfinal an thleng zo lo a nih chuan Graham Potter-a tan Stamford Bridge-a cham reng a harsa ang.

Chelsea thar

Chelsea-in nipui leh thlasik bazarah player 17 lei nan pound maktaduai 600 an hmang a, London club hi an danglam ta hle. Graham Potter-a'n player ṭha ber a hre lo tia sawi pawl an awm a, chutihrualin club neitu lamin player an lak hnem avangin a fawng chelhtu tan pawh hmanraw lek dan tur hriatthiam a har ngei ang.

Badiashile Out

Brighton-a manager hlawhtling Potter kha Chelsea-ah chuan hlawhchham la ni lo mah se hlawhtling tih chi rual a ni lo. Club neituten Potter-a dinhmun a la ngheh thu an sawi a, hei hian an result a ṭha lo tih a finfiah.

Chutihrualin Blues-in khelh dan nghet an nei ṭan dawn niin a lang. Fulham leh Hammers lakah tlarhnunga awm player pangaten (goalkeeper Kepa tiamin) bul an ṭan nawn.

Monaco aṭanga Blues zawmtu Benoît Badiashile a rintlak chho a, French defender hi Thiago Silva nen an inkawp. Mual sirah Marc Cucurella leh Reece James te an awm. Cucurella hi a ṭha tawk lo a nih chuan Ben Chilwell a dam leh ta bawk.

Mahse, UCL danah January-ah player thar pathum chauh ziah luh theih a ni. Badiashile hi UCL squad-ah telh a ni lo a, Borussia Dortmund a hmachhawn thei dawn lo. Match hnih chhung khel tawh lo, Trevoh Chalobah chungah rinna an nghah a ṭul ang.

Ziah luh pathum

Chelsea tana chanchin lawmawm chu Enzo Fernández hi a ni a, FIFA World Cup 2022 best young player hi a khelh chinah a man phu khawpin a khel ṭha. Argentine midfielder man hi pound maktaduai 107 daih a ni.

Mahse, Blues hian goal khung an harsat a, an goal bawh a la na tawk lo. Joao Felix-a'n West Ham lakah goal a khung a, Portuguese forward chungah mawhphurhna a tla dawn.

Felix leh Enzo bakah hian UCL khel turin Mykhailo Mudryk an lalut a, Premier League hmahruaitu Arsenal-in an awh em em Ukranian winger hian beisei a pha rih lo hle. Mahse, Mudryk hian theihna a nei tih chu Liverpool lakah a lang tawh a, chutihrualin match khat khelh tluan pawh a la neih loh avangin tun dinhmunah chuan a man chanve pawh a la phu pha rih lo.

An insiamṭha hret hret

Chelsea-in match thum chhung chak hmel an hmu lo a, chutihrualin chak loh an nei bik lo - match hnuhnung pathumah hian an inhnehtawk vek. Blues hian Premier League match hnuhnung pathumah point thum chauh hmu mah se khelmualah erawh an insiamṭha tih a hriat theih.

West Ham lakah Blues an vanduai a, referee thutlukna vang chauha point thum hmu loa sawi theih an ni. Potter-a'n chak dan thuruk a zawng chho mek a, an khelh dan thlir chuan chak dan a thiam chho dawn ni pawhin a lang. Mahse, an khingpui tur hi Borussia Dortmund an ni.

Dortmund chu

German club ṭha Borussia Dortmund hi pawn lang taka thlir chuan Chelsea letling thawk an ni a, London club-in player lei nana sum an hman laiin anni chuan player hralhna aṭangin sum an hui lut thung.

Mahse, German club hian Jadon Sancho leh Erling Haaland hralhna sum chu player lei nan an hmang tih hriat a ṭha. Kumin transfer bazarah Dortmund hian player hralhna aṭangin pound maktaduai 80 vel an lalut a, player lei nan pound maktaduai 100 chuang hret an hmang.

Haaland thlakna tura an lakluh Sébastien Haller pawh a dam ṭha leh tawh a, Dortmund hian kuminah match ruk khel tawhin an la chak vek. German club tana chanchin ṭha lo awmchhun chu forward Youssoufa Moukoko a inhliam.

Dortmund player innghahna Jude Bellingham hi English player a ni a, English rawlthar dang Jamie Bynoe-Gittens pawh tun hnaiah hma a sawn hle. Kum 18 mi Bynoe-Gittens hian kartawpa Werder Bremen an hneh ṭum pawhin goal hmahruai a khung.

Dortmund coach Edin Terzic leh Chelsea boss Graham Potter te hi ṭhian ṭha tak an ni a, khelmualah erawh ṭhian ṭha a sawi theih dawn loh - football hmuhnawm an chhawpchhuah ngei beisei a ni.