Liverpool an tho ve ta - Everton an hneh!

Merseyside derby an khelh meuh chuan Liverpool tak tak kan hmu leh ta a, hmanni lawka European football rum ṭhaihtu kha an la hlauhawm reng e - Pathianni zan khan Everton chu 2-0 in an hneh.

Kum 2023-a Premier League-a Liverpool an chak vawi khatna a ni a, Reds fan-te lawmna tizualtu chu Mohamed Salah leh Cody Gakpo ten goal an khung kha a ni - Liverpool an harh ṭan e.

Liverpool boss Jurgen Klopp chuan, "Kan nih dan tur reng a ni a, kan nih phung reng a ni e," tiin an khelh dan chungchang a sawi a, rei tak an chak zawh loh hnua an chak ve leh ta chu a hlim hle.

Reds hian Premier League table-ah pakuana dinhmun an luah a, palina Newcastle United chu point kuain an phak lo mek - match khatin an khel tlem thung a, European football beiseina a la thi lo.

Hahdamna

Liverpool hian an league match hnuhnung paliah chak an nei lo. Goal kua an chhuah a, goal khat chiah an khung - uanpui chi a ni lo a, "Kei ka ni," inti ngam club tan chuan zah vanga kun tlawk tlawkna chi a ni.

Merseyside derby hmaa an match hnuhnung berah Wolverhampton Wanderers chu 3-0 ngawtin an ngam lo a, Everton lakah pawh fans tam tak beiseina a sang lo - tun hnaia an khelh dan thlirin an demawm lo.

Mahse, minute 36-naah Anfield-in auna tur an nei nghal. Everton defender James Tarkowski-a'n post a tauh per aṭanga ball kal zel chu Darwin Nunez-a'n Everton goal lamah a tlanpui a, Salah tan ṭha zeta a siamsak hnuin, Egyptian forward hian Everton keeper Jordan Pickford lo tlan chhuak chu mawi takin a pet khum.

Tun season-a beisei phak lo Salah-a'n league match nga zet goal a khung loh hnuah a khung ve leh ta a, sawiseltute a ngawihtir - inelna hrang hrangah match 32 khel tawhin, 'beisei phak lo' chungin goal 18 chu a khung tawh tho.

Engmaw in sawi?

Cody Gakpo-a'n January transfer-a Liverpool a zawm khan beiseina a sang a, a awm lo hran lo. A man ringawt pawh pound maktaduai 45 thlenga sang chho thei tur a ni a, PSV Eindhoven tan tun season-ah match 24 khel hmanin goal 13 a khung bawk a, assist 17 a nei bawk.

Mahse, Liverpool a pan hnuah match ruk zet goal khung loin a awm a, Netherlands boss Ronald Koeman chuan, "Liverpool a pan hma hret a ni," a ti a, PSV boss Ruud van Nistelrooy chuan, "Ka thurawn pawm loin, Manchester United aiin Liverpool a thlang a ni," a ti bawk.

Mahse, hriat loh an nei - heng sawiselna zawng zawng hian Gakpo a tichak zual sauh a, amah seltu thawm ri va karah Reds tana a goal hmasa ber a khung ta. Dutch forward hian Trent Alexander-Arnold-a cross chu minute 49-naah hnai set sawt aṭangin a chhuih lut.

Kum 23 mi Gakpo hi goal a khung hnuah a inringtawk sawt a, a chevel hmuh a nuam hle. Gakpo chuan, "Liverpool tana ka match hmasa bera goal khung nghal kha ka châk hle. Mahse, a tawpah chuan nghah hret a ngai a, goal ka khung avangin ka lawm hle a ni," a ti.

Lawmna tur

Liverpool-in goal an chhuah lo a, goal hnih an khung bawk - hei ringawt pawh hi lawmna tham a tling a, tun hnaia an tih hleihtheih loh pahnih an tih avangin point thum an hlawh chhuak a, beiseina thar an nei ang.

Hliam vanga rei tak an chawlh hnuah Diogo Jota leh Roberto Firmino te pawh bench aṭangin an tlan lut ve leh ta a, Virgil van Dijk la inlan thei chiah lo mah se bench-a a awm ringawt pawh kha Reds fans tan chuan thlamuanna tham a ni.

Kum 18 mi Stefan Bajcetic lam hmaih a harsa - Spanish defensive midfielder hi a khel ṭha a, a inringtawk a, a ball pek a dik a, tharum a ngahzia hmuh turin a awm bawk.

February 18-ah Liverpool hian Newcastle United an lenchilh zui dawn a, result duhawm tak nei chunga leng tur an nih avangin an inringtawk sawt dawn. Hetihlai hian Everton erawh relegation zone-ah an la awm mek a, Sean Dyche hoin talchhuah dan ngaihtuah zel a ṭul.