Benfica khingpui tur Brugge

Champions League last 16-ah Club Brugge leh Benfica te hi champion rinkai lo zinga mi ni ve ve mah se an inhmachhawn dawn miau avangin pakhat zawkin quarterfinal an lut dawn.

Zanin dar 1:30 hian Jan Breydel Stadium-ah Brugge-in Benfica hi an mikhual dawn a, Portuguese club hian Enzo Fernandez chân mah se a buk rit zawk tura ngaih an ni.

Benfica hian season ṭha tak an hmang a, group stage-ah PSG leh Juventus nen an awm ho chungin hmahruaitu an ni thei. Primeira Liga-ah pawh Benfica hian match 20 aṭanga point 53 hmuin hmahruaitu an ni mek bawk.

Eagles tan hian World Cup-a Portugal tana che ṭha Gonçalo Ramos chuan inelna hrang hrangah goal 18 khungin season ṭha tak a hmang. Tlarhma tichak turin Portuguese star dang João Mário leh Rafa Silva te an awm bawk.

Tlarhnung lamah World Cup-a Argentina champion puitu defender Nicolás Otamendi a awm. Midfield-ah Enzo a chhuah tak avangin Chiquinho chungah mawhphurhna a lian dawn. Benfica hi kar liam ta khan Braga hneh loh vangin Taca de Portugal-ah an tla a, Club Brugge lakah insiamṭhat an tum ang.

Belgian club Brugge erawh an ram inelna Pro League-ah an che ṭha tawk lo. Scott Parker-a hote hian match 25 aṭanga point 42 chauh an hmuh theih avangin palinaah an awm pha chauh a, nikum November thla aṭang khan an ram league-ah chak hmel an hmu tawh lo. Tun hnaia an khelh dan thlir chuan Brugge tan Benfica hneh hi a harsa khawp ang.