Roque duhtu an ṭhahnem

South American Youth Football Championship 2023-a Brazil champion puitu forward Vitor Roque chu European club aṭanga duhtu an ṭhahnem a, Barcelona bakah Premier League club an tel.

Roque man hi a khelhna Athletico Paranaense president Mario Celso Petraglia-a'n a to tur thu a sawi nghal!

Petraglia chuan, "Roque duhtu an ṭha-hnem. European club pek ang zat sum kan pe thei lo. Chutihrualin European club pawhin kan pawisa phut ang zat an pek ve a ngai a, tunah chuan kan beisei ang zata rawn dawr an awm lo," tiin a sawi.

Paranaense hian April 2022 khan club record-in Roque hi Cruzeiro aṭangin an lalut a, a man hi Brazilian real maktaduai 24 niin euro maktaduai 4.33 vel a ni. Paranaense president Petraglia chuan Roque manah hian an leina let 10 vel a beisei a, euro maktaduai 40 chho chuan a lakluh theih ang.

Roque hi kum 17 mi chauh a ni a, Sudamericano Sub-20 neih zawh takah khan goal ruk khungin Chelsea player thar Andrey Santos nen an khung hnem ber. South America club inelna lian Copa Libertadores-ah kum 2022 khan Paranaense chu final thlenpuiin team of the tournament-ah a tel a ni.