Ancelotti-a'n Real a châm a duh?

Real Madrid boss Carlo Ancelotti chanchinin tun hnaiah ngaihven leh sawi a hlawh hle - Italian coach ropui hian Spanish champion-a a contract chu kum 2024 hian a hmang zo tawh dawn a, Brazil national team chu hming ri ring zual a ni.

Mahse, King Carlo hming lem an pek coach hian Real Madrid-a cham zel a la duh nia sawi a ni a, a contract neih lai hmang zo mai ni loin, a pawtsei mai thei, tih thlengin an sawi.

Kar hmasa lawk khan Ancelotti hian Brazil coach ni turin Selecao chu inremna a neihpui tawh ang hiala sawi a ni a, mahse, Brazilian FA chuan Italian coach hi inremna an la neihpui loh thu sawiin, thuchhuah an siam.

Kum 63 mi coach hian kar hmasa lawk khan Real chu FIFA Club World Cup-ah champion nomawi a chawipui leh tawh a, Santiago Bernabeu-ah Ancelotti chelh duhna a lian zel niin a lang.

Brazil nen

World champion ni ngun ber Brazil hi engtiklai mahin team chhia ni ngai lo mah se tun hnaiah an ropui hleithei lo a, kum 2002 hnuah World Cup nomawi an chawi leh tawh lo.

Chu mai a ni lo - kum 2002 hnua World Cup an khelh pangaah, vawi khat bak semifinal an inpetkai thei lo a, quarterfinal-ah an tla vek. Semifinal-a inpetkai ṭum lahin, Germany chuan an khawtualah ngei 7-1 ngawtin an sawp.

World Cup 2022-ah coach Tite hoin beiseina sang tak nei mah se quarterfinal-ah bawk an tla a, Croatia an ngam lo - Tite a bang zui a, tun thlengin Brazil hian Coach nghet an la nei leh lo a, Ancelotti nena sawizawm an ni pawh a awm lo hran lo.

Mahse, Brazilian Football Confederation chuan Ancelotti lalut tur anga sawi an nih hnuah thuchhuah siamin, "A hun takah coach tura inremna kan neihpui chu puan a ni ang," an ti.

A nghet

Brazil hi Ancelotti nen chauh sawi zawm an ni lo a, Brazilian media-te chuan Spain coach bang ta Luis Enrique, Manchester City boss Pep Guardiola, Real Madrid coach hlui Zinedine Zidane leh AS Roma manager Jose Mourinho te hming pawh an lam ri.

Ancelotti hian, "Ka dinna chu a chiang reng alawm - kum 2024 thleng Real-ah hian contract ka nei a ni," tiin Club World Cup final khelh hma khan a lo sawi tawh a, tunah contract thar ziak duh anga sawina thawm a ri leh ta.

Hetihlai hian Real Madrid boss hlui leh Ancelotti ang thoa Italy lam chhuak, coach ropui Fabio Capello chuan Ancelotti-a'n Brazil a enkawl a nih chuan thil duhawm tak a nih tur thu a sawi.

Capello chuan, "Hma hun duhawm tak a nih chu. National team enkawl hi chu a dan a dang ṭhin a, mahse, a tan chuan a career tawp lama Brazil enkawl chu a châkawm khawp ang - ka hun tawp hnaih lam England bench-a ka hmang ang khan," a ti.

Fakna

Capello chuan a hnampui Ancelotti chu fakin, "Ancelotti hi coach ropui tak a ni a, Italy-ah chuan coach ropui ber a ni hial ang. Kalna apiang maia nomawi chawi hi a harsa em em a, mahse, a tih theih miau avangin coach ropui ber a ni," a ti a, a fak hle.

Kum 76 mi ni ve tawh Capello leh Ancelotti hian inanna deuh an nei - Juventus, AC Milan leh Real Madrid hi coach pahnih hian an enkawl ve ve tawh a, nomawi an chawipui nual bawk.

Ancelotti hian Real Madrid a enkawl hmasak zawkah June, 2013 - May, 2015 inkar kha a enkawl a, June 2021 khan Santiago Bernabeu-ah bawk lo kirin, Real Madrid hi a enkawl leh a ni.

Player a nih lai pawha Italy tana vawi 26 inlan thei Ancelotti hi kum 63 mi a ni ve tawh a, Brazil nena sawizawm a ni hi a awm lo hran lo - kum upat tawh lamah chuan kartin inkhelh ngai lo a, national team enkawl hi a châkawm ang.

Hlawhtlinna

Hetihruala hriat tel ngei ngei ngai chu Real tana Ancelotti hlawhtlinna hi a ni - Real a enkawl hmasakah khan La Liga nomawi chawi lo mah se Champions League, UEFA Super Cup, FIFA Club World Cup leh Copa del Rey-ah te champion nomawi a chawi.

Season hmasa khan La Liga, Champions League leh Spanish Super Cup-ah a champion pui leh a, tun season ṭan dawn khan UEFA Super Cup-ah nomawi chawipuiin, FIFA Club World Cup-ah an champion bawk.

Ancelotti hian Real tan nomawi pakua a chawi tawh a, Santiago Bernabeu-a champion hnem lamah nomawi 11 chawitu Zinedine Zidane leh nomawi 14 chawitu Miguel Munoz a phak lo.

Tun season-ah pawh nomawi beisei tur pathum an la nei a, Champions League, La Liga leh Copa del Rey-ah te champion an la beisei thei vek a ni - heng zinga nomawi pakhat tal a chawi leh phei chuan, contract thar ziahna chance a sang hle.

Hmabak chu

Chutihrual chuan Ancelotti tan hna a awlsam dawn lo - La Liga-ah zanin dar 1:30 hian Elche an mikhual dawn a, chak mai tura beisei an ni. Chutihrual chuan an elpui Barca an kaltluang viau a, Real tan um phak a harsa dawn.

La Liga hmahruaitu Barcelona hi tun season-ah vawi khat chiah an la tlawm a, mahse, an tlawm chhun erawh Santiago Bernabeu-a 3-1 ngawta Real an ngam loh chu a ni - Nou Camp-ah an la inkhel leh dawn bawk a, Real tan umphak theih an la ni.

Barca hian point 11-in Real hi an tlansan mek a, zanina an chak erawh chuan point riat chauh an inkarah a awm zui ang. Copa del Rey semifinal-ah pawh Real hian Barca tho an hmachhawn dawn a, Supercopa de España final-a an hneh loh Catalan club tan mangchhia nih an tum ang.

Real hian Champions League last 16 an lut tawh bawk a, February 21 zanah Liverpool an lenchilh dawn - Ancelotti tan hmabak hautak a inchhawp zel a, a hmachhawn zel dan tur hi hmuh châkawm chu a ni ta.