Inter Milan an chak zo lo

Serie A champion tur a la puan ngam chiah loh a. Chutihrual chuan nomawi chawi tur a rin thiam theih ta. Thawhṭanni zan inkhelah Inter Milan chu Sampdoria nen 0-0 in an inhnehtawk.

Inter an chak zawh loh avang hian hmahruaitu Napoli chu an sang fal ta hle. Naples club hian match 22 aṭangin point 59 an hmu a, khelh zat inangah pahnihna Inter aiin point 15 tehmeuhin an sang fal ta a ni.

Simone Inzaghi naute hian an match hnuhnung lamah Atalanta leh AC Milan an hneh thei, tun hnai an khelh dan thlir chuan table mawng lama talbuai Sampdoria hi hneh tura ngaih an ni.

Mahse, Inter hian ball chang tamin inkhel thunun mah se goal an khung thei tlat lo. Nerazzurri coach Inzaghi chuan, "Kan khingpui tur hi eng team pawh ni se theihtawpin kan inbuatsaih ṭhin.

"Tun ṭumah pawh khan hun remchang ṭha chu kan insiam thei, mahse goal khung theih lohna inkhel hi a awm ve tlat. Sampdoria kha an inveng thiamin an ṭangrual em em, keini lam kha tun aia ṭha zawk khan kan khelh a ngai," a ti.

A hniam ber dawta awm Sampdoria hian point 11 chauh an la nei a, season tharah chuan Serie B lamah an inlan a rinawm, chutihrualin match khelh hmabak an la ngah avangin inhamtang turin beiseina a la awm.