Alonso-a'n beisei a nei sang

Formula 1 champion vawi hnih ni tawh Fernando Alonso chuan season thar a thlir a, a team thar Aston Martin lakah beisei a nei sang, engtik niah emaw chuan F1 team champion an la nih theih a rin thu a sawi.

Spanish driver Alonso hi July thlaah chuan kum 41 a ni dawn, kumin hi a tan F1 season 20-na tur a ni bawkin tawnhriat a ngah tawh hle a, champion tura rinkai ni chiah lo mah se Aston Martin tan chuan hlawkna tam tak a thlen theih a rinawm.

Alonso chuan, "Tun season chhungin ka ti ngam chiah lo a, mahse team ruahmanna leh hmalak dan ka chhut chuan engtik niah emaw Aston Martin hi F1 champion a la ni ang tih ka sawi ngam.

"Car pawh kan nei ṭha, beiseina pawh kan nei sang hle. Aston Martin ka zawm tirh aṭangin lawmna tur tam tak a awm, ka ṭhian tharte hian ka hlutna aia sangin min ngai pawimawh thiam," a ti.

Car intlansiakna sang ber Formula 1 season thar hi March 5 aṭanga tlan ṭan tur a ni dawn, intlansiak hmasa ber atan Bahrain Grand Prix an tlan ang.