Bengaluru leh Blasters ten fans chet dan an dem

Indian Super League club Kerala Blasters leh Bengaluru FC chuan Inrinni zana team pahnih intawn ṭuma buaina chhuak an dem thu an puang a, Sree Kanteerava Stadium-a inkhelah hian team pahnih fan-te an intibuai a ni.

Club pahnihte chuan, "Stadium-a thil thleng kha club chuan pawi kan ti takzet a, kha thil thlenga inrawlhte kan hriat theih nan theihtawp kan chhuah mek a ni," an ti a, hetiang thil a thlen nawn tawh loh nana theihtawp chhuah chu an zavaia mawhphurhna a nih thu an sawi bawk.

Inrinni zan inkhelah hian Bengaluru hian 1-0 in hnehna an chang a, playoff khelh beiseina an neih thar phah - table-ah pangana an ni mek a, pasarihna Odisha nen point khat chauhin an inthlau!

Tun season-ah parukna chinin ISL playoff an khel dawn a, Bengaluru hian zanin dar 7:30-ah league round hmahruaitu ni chiang tawh Mumbai City chu an mikhual ang.

Bengaluru coach Simon Grayson chuan, "Mumbai hneh tur khawpin kan thawkrim a, kan phur em em bawk. Mumbai coach Des Buckingham hian tlawm nei loa league round khar thei record siam a duh dawn a, chuvangin a player-te nen an inpeih khawp ang," tiin a sawi a, Mumbai hian Lallianzuala Chhangte leh Lalengmawia Ralte (Apuia) an nei.