TKS leh Hotshots chak nawn

Mizoram Super League (MSL) season 8 khelh laiah Tuikual South leh Mission Veng Hotshots ten bul an ṭan fuh hle a, match hnih an khelh tawh chinah an la chak ve ve, champion lai Zarkawt BCA te nen an la chak vek.

Thawhlehni zan R. Dengṭhuama Indoor Stadium, Mualpuia inkhelah Tuikual South hian team thar Champhai chu 84-74 in an hneh. Phengphehlep hi quarter pali an khelh zinga pahnihna tih lohah an chungnung vek a, harsa lutuk loin an chak.

MSL khelh ṭan a nih aṭangin TKS hi team hmuhnawm zinga mi an ni ṭhin a, la champion chiah lo mah se kuminah pawh team dang tana hmachhawn châkawm lo tak an ni leh dawn. Tawnhriat nei ṭha Laldinliana hoin an la khel thei a ni; Zirtawpni zanah Khatla TBL nen an inhmachhawn leh ang.

Inkhel dangah Mission Veng Hotshots chuan Khatla South Barons 82-62 in an hneh, an match hmasa lamah Bungkawn LB an lo hneh tawh bawk. Hotshots an khel ṭha ṭhin, chutihrualin an hneh tak team pahnih hi MSL-ah chuan mi thar an ni.