San Siro-ah Spurs an tlawm

Serie A champion AC Milan-in tun season-ah league nomawi humhim theih hmel lo mah se Champions League lamah erawh an kal zel a, Thawhlehni zan khan round of 16 first leg-ah Tottenham Hotspur chu 1-0 in an hneh.

Milan khaw club tan Brahim Diaz chuan inkhela goal awmchhun a khung a, Spurs-in a chhanletna tur an neih loh avangin an tlawm haw - an muala an khelh ve hunah 'comeback' an tum ang.

AC Milan hian European football-a club inelna sang berah nomawi pasarih ngawt lo chawi tawh mah se, kum 2012 hnuah quarterfinal an la lut leh lo a, an ropuina kha neih let leh tumin an bei zel dawn.

Beiseina

Season hmasa khan AC Milan-in Serie A nomawi an chawi a, kum 2011 hnua an champion leh hmasak ber a ni - Milan ṭantute an phur a, hmana an ropuina kha an nei let leh dawn niin an ngai.

Mahse, tun season-ah beisei an phak lo. Kar hmasaa Torino an hneh hma khan, kum 2023 chhungin Serie A-a point 15 hlawhchhuah theih aṭangin point hnih chiah an hlawh chhuak a, table-ah pangnaah an tla thla hial.

Milan fan-te an hlim lo a, an beiseinain Champions League lam an thlir a, fan-ten an beisei ang ngeiin result an nei - minute riatna lekah Diaz chuan goal hmahruai hi a khung a, hun tawp thlengin Spurs-in an chhang thei lo.

Milan an ṭha

AC Milan chanchin sawi hi chuan mi tam tak mitthlaah Paolo Maldini, Kaka, Andrea Pirlo, Andriy Shevchenko leh Alessandro Nesta te ho an lo lang ngei ang - mahse, tunah erawh he Milan team hian 'star' tia chhal theih kawl an nei meuh tawh lo.

Chutihruala an la thlah loh erawh tun hma aṭanga an larpui ṭhin tlarhnung phui a ni a, Spurs lakah pawh Milan tlarhnungin an tih tur tak an ti a, an hna an hrechiang a, tlarhmaa Harry Kane, Son Heung-min leh Dejan Kulusevski te inkawp pawhin an su hawng zo lo.

Spurs hian chance duhawm tia han sawi tur an nei tam lo a, Son-a ball pet ṭha tak aṭanga chance nei Kane leh Eric Dier ten an hun ṭha neih an chhawr thei lo kha an ui vawng vawngin a rinawm - midfield-ah hrem vanga Pierre-Emile Hojbjerg inlan thei lo leh, hliam vanga Rodrigo Bentancur inlan thei lo chu an tuar bawk niin a lang.

A behbawm

San Siro-ah Milan an chak a, an goal venhim an tumna an hlawhtling bawk. Chutihrual chuan goal khat aia tam zawk khung thei an ni a, an hun ṭha neih an chhawr lo chu an ui khawpin a rinawm.

Milan tan Belgian midfielder Charles de Ketelaere leh German defender Malick Thiaw ten tauh goal theihna remchang, hun duhawm zet an nei a, mahse, an chance neih hi chhawr loin an khawhral - an ui vawng vawng ang.

Antonio Conte tan erawh London khawpuia comeback turin siam ṭhat ngai tam tak a awm - Bentancur hmun ruak hnawhkhah dan tur a ngaihtuah a ṭul a, San Siro-a khel chhe em em Cristian Romero-a'n world champion defender a ni, tih a pholan a ṭul bawk.