Hnehna chang turin Swiatek a inringtawk

Season hmasa khan tuma el phak rual lohin Iga Swiatek a kal fal a, kuminah erawh a la che fuh hleithei lo. Tun kara khelh tur Qatar Open-ah chuan Swiatek hian result ṭha neih theih ngei a inring.

January thlaa khelh Australian Open-ah khan Swiatek hi last 16-ah a tla, hliam tenau a neih zui avangin tournament a khel zui lo, tun ṭum hi a inlan lehna hmasa a ni hial, ranking lamah erawh nikuma a chet ṭhat em avangin a la sang fal hle thung.

Poland nula Swiatek chuan, "Engtik lai pawhin duhthusama khelh ṭhat reng theih chu a ni lo, chutiang tur pawh chuan ka in beisei ngai lo. Mahse, theihtawp erawh ka chhuah reng a, thawhrim a ngai hle tih a chiang thar ṭhin," a ti.

Hmeichhe tennis thuneitu sang Women's Tennis Association (WTA) chuan ranking thar an ti chhuak a, kum 21 mi Swiatek hian point 10485 hmuin a chung berah a awm, pahnihna Aryna Sabalenka chuan point 6100 a hmu thung.

A sang zual 20 zingah Annett Kontaveit a tel phak ta lo. Nikum St. Petersburg tournament champion hi season a hmang ṭha lo, inelna hnuhnung Abu Dhabi-ah last 16 paltlang zo loin, ranking lamah pawh player pakua ngawtin an rawn khum.

Abu Dhabi champion Belinda Bencic chu pakuanaah a inhlangkai a, final-a a hneh tak Liudmila Samsonova chu 15-naah a awm ve bawk.