Valencia manager thar Ruben Baraja

Spanish club Valencia chuan manager thar atan an midfielder hlui Ruben Baraja an lalut a, kum 47 mi coach hian Gennaro Gattuso a thlak dawn a ni.

Player a nih laia Spain tana vawi 43 inlan thei Rubén Baraja hi Valencia fan-te zingah a mikhual lo. 2000-2010 inkar kha Valencia tana khelin, match 364 ngawt a inlansak a, goal 57 a khung.

Spanish club hi an ropui vanglai tawnpuiin, La Liga (2), Copa del Rey (1), UEFA Cup (1) leh UEFA Super Cup (1) nomawi a chawipui a, coach a nih hnuah player a nih laia a hun tawn ropui ang hi a tawnpui leh an beisei ang.

Valencia hi an league match hnuhnung pasarihah vawi ruk an tlawm a, table-ah 18-na ni mekin, relegate thei dinhmunah an ding mek - Baraja hmabak hi a awlsam dawn lo.

Spanish club chuan thuchhuah siamin, "Pipo, Valencia club chanchina player hlawhtling ber pawl hian he club duhna leh beiseina te hi a hrechiang hle a, chumi tihlawhtling a, Valencia tana a lo hlawhtlin tawhna chhawm nung turin Coach ni chungin a lo kir a ni.

"Club training ground Ciutat Esportiva de Paterna-ah team a kaihruai thuai dawn a, a coaching staff zingah hian Valencia legend zinga mi Carlos Marchena a tel bawk," an ti.

Baraja hi coaching khawvelah a mikhual hran lo. Valencia hma hian Elche, Rayo Vallecano, Sporting Gijon, Tenerife leh Real Zaragoza a lo enkawl tawh a, kum kua pawh tling loa Valenica manager nghet 10-na a ni.

Coaching staff zinga mi Carlos Marchena pawh hi Valencia tana 2001-2010 inkar lo khel tawh kha a ni a, Baraja nen an inhrechiang viau - Spain tan vawi 69 khelin, FIFA World Cup 2010 leh UEFA European Championship 2008-a champion team zingah khan a tel a, a professional career tawp chu 2015 khan Kerala Blasters tan a rawn hmang.

Valencia hian Gattuso an ban hnu khan Voro Gonzalez chu coach lailawk atan an ruai a, a vawi riat nana Valencia coach lailawk hna chelhtu hian match thum a kaihhruaiah Valencia hi a tlawmpui vek a ni.