Saudi-in Club World Cup thleng dawn

Tun hnaia football khawvela ngaihven hlawh thar Saudi Arabia chuan FIFA Club World Cup 2023 a thleng dawn a, inelna hi December 12-22 chhunga neih tur niin, Saudi-in khawmualpui club champion-te inelna a thlen hmasak ber tur a ni.

Kum 2000 aṭang khan Club World Cup hi khelh ṭan a ni a, ram paruk chiahin inelna hi an la thleng - Saudi hi a thlengtu pasarihna an ni dawn tihna a ni a, hetihrual hian mihring dikna chanvo humhalh pawl (human rights) lam chu FIFA thutluknaah hian an lungawi lo hle thung.

Mihring dikna chanvo humhalh pawl lar tak Amnesty chuan thuchuah siam nghalin, "Women's World Cup atana 'Visit Saudi' an thawhpui hnu lawkah, he ramin mimal zalenna an rah beh dan te, hnathawkte chunga an hleilennate hai derin FIFA chuan Club World Cup an thlentir leh dawn a ni," an ti a, World Cup thlengtu tur Australia leh New Zealand chuan WC sponsor zinga Saudi tel chungchang hi sawifiah turin FIFA hnenah an lo ngen tawh.

Prince Abdulaziz bin Turki Al Faisal chuan tun hnai khan Saudi chuan sawisel a tawh reng tho tur thu a lo sawi tawh a, CWC thleng tura thlan an nih chungchangah, "Saudi Arabia-a khawvel club ropui leh an fan te kan lo mikhual thei tur hi kan lawm hle a ni," a ti.

World Cup 2022-ah khan Saudi Arabia hian khawvel barakhaihin Argentina an hneh a, Saudi club Al Nassr chuan khawvela footballer ropui ber pawl Cristiano Ronaldo chu December khan lalut bawkin, khawvelin Saudi football a ngaihven phah hle.

Prince Abdulaziz chuan, "Khelmual chhunga kan tih theih chin chu fan-ten an hmu tawh a, inelna thlen kawnga kan theihna pholan hun kan nei leh ta," a ti a, an ram football hmasawnna atan CWC thlen chu thil pawimawh tak a nih thu a sawi bawk.

FIFA chuan Club World Cup hi June 2025 aṭang chuan team 32 tel theihna turin ruahmanna a siam a, mahse, kum li danah neih tur niin, European team 12 an inlan tawh ṭhin thung ang.

Saudi Arabia hian FIFA World Cup 2030 chu Greece leh Egypt te nena ṭang hoin, thlen an tum bawk a ni.