Alcaraz hliam chhawrtu Djokovic

Mipa tennis thuneitu sang ber Association of Tennis Professionals (ATP) ranking chhuak thar berah Novak Djokovic chu pakhatna a ni zel a, tennis player piang tawh zawng zawng zinga number 1 ni rei ber ni turin a dinhmun a ṭha ta hle.

Serbian star hi ranking-ah chawlhkar 376 chhung chu number 1 a ni tawh, mipa leh hmeichhe chhiar kawpa number 1 ni rei ber Steffi Graf (377 weeks) a nih rual teuh tawh hle, a khum ngei dawn ni pawhin a lang.

Djokovic hi player ṭha bik a ni a, a theihna a sang tih chu phat tur a awm lo. Mahse, season hmasa hmang ṭha tak, number 1 hial pawh ni thei Carlos Alcaraz chu hliam vangin hun rei tak a inkhel thei lo.

Spanish rawlthar hi a inkhelh miau loh avangin a ranking a tla hniam zel a, a tan tih theih a awm lo. A awm loh karah midangin point an hmuh belh zel si, tunah chuan number 3 a nih rih a ngai.

Kum 19 mi Alcaraz chuan, "Number 1 ka nihna aṭang khan hun rei tak a liam leh ta, tunah chuan ka dinhmun ngai kha luah leh tura beih hun a ni," tiin a sawi a, tun kar chhunga khelh tur Argentina Open-ah a inlan ang.

Djokovic chungchang sawi zuiin Alcaraz chuan, "Ani hi chuan ṭhat tawk lohna lai a nei lo. A taksa a hrisel ṭhain sawisel tur a awm lo a, a rilru phut hmang hi a paukhauh takzet bawk, hetiang dinhmun a luah reng thei hi ka ngaihlu hle," a ti.