Bagan dinhmun a derthawng

ATK Mohun Bagan-in Indian Super League-ah chak mamawh mah se Hyderabad FC lakah 1-0 in an tlawm a, playoff khelh duha tuihal Kolkata club dinhmun a him lo - table-ah palina la ni mek mah se, pasarihna Odisha aiin point khat chauhin an sang zawk.

Thawhlehni zana inkhelah Hyderabad tan Bartho-lomew Ogbeche chuan inkhela goal awmchhun a khung a, kum 38 mi ni tawh mah se Paris Saint-Germain striker hlui hian a la tar lo tih a pholang nawn - Hyderabad tan hian tun season-ah goal riat a khung leh der tawh a, assist vawi hnih a nei.

Mariners hi league match thum zet chu a zawnin an chak zo ta lo a, an sum hman dan ngaihtuahin an dinhmun hi lungawina tur a ni lo - Kolkata club tan hian K. Lalṭhathanga chuan inkhel bul a ṭan a, Lalrinliana Hnamte chu minute 62-naah bench aṭanga luhtir a ni bawk.

Zanin dar 7:30-ah ISL inkhel pakhat a awm dawn bawk a, playoff khelh beiseitu FC Goa-in Mizoram player awm lohna Chennaiyin an mikhual ang - Goa hian Ayush Chhetri leh Lalremruata Pialtu (HP-a) an kawl thung.