Zanin 11:15-ah Barcelona Vs Manchester United

Manchester United-in hun duhawm bik an tawn tawhna hmun Nou Camp chu zanin dar 11:15 hian an tlawh dawn a, an khingpui tur erawh Bayern Munich ni loin mual neitu FC Barcelona an ni ang.

Europa League knockout playoff match riat awm turah Barca leh Man United inkhel tur hi en châkawm ber lawrlak a ni a, tun season-a an chet ṭhat dan thlir phei chuan Champions League-a inkhel tur ni awm zawk tak an ni. Catalan club hi La Liga hmahruaitu an ni a, Man United hi Premier League-ah pathumnaah awm mekin inelna palinaah champion beiseina an la nei vek.

Hrem leh hliam

Manchester United-in tualchhung inelnaa hrem vanga an chhawr theih loh Casemiro an hmang thei dawn a, amaherawhchu Lisandro Martinez bakah Marcel Sabitzer te chu hrem vangin an khel thei dawn lo.

Martinez hi Europa League group stage-a yellow card pathum hmuh vang a ni a, Sabitzer erawhin Bayern Munich tana yellow card pathum hmuh vanga hremna a chhawm thung. Christian Eriksen leh Donny van de Beek te inhliam vangin an khel thei dawn lo bawk.

Barcelona pawhin midfielder pawimawh Sergio Busquets leh winger nung ṭha Ousmane Dembele te inhliam vangin an khel thei dawn lo. Player dang erawh an dam ṭha a, football hmuhnawm tak chhawp chhuah theih a ni ang.

Lewy vs Rashford

Barcelona tak tak phochhuah a ni ta, Xavi hote hian La Liga-ah match 21 aṭangin point 56 hmuin Real Madrid aiin point 11-in an hmu tam zawk. Catalan club hian league bikah Los Blancos chauh an hneh lo a, goal 43 khung tawhin goal sarih chauh an la chhuah.

Polish striker Robert Lewandowski-a'n Germany aṭanga Spain a pan hnuah goal khung a la bansan lo a, tun season-ah pawh inelna hrang hrangah goal 23 a khung tawh. Man United tlarhnung tan pawh Lewy hi ven uluk a ṭul dawn.

Barca hian Lewy thlawp turin Gavi, Raphinha leh Pedri te an awm a, midfield lai uap lum turin United manager Erik ten Hag-a awh em em Frenkie de Jong a ni. Tun season-a Catalan club ṭha tak erawh an tlarhnung hi a ni a, Andreas Christensen leh Ronald Araújo te inkawp hi an rin tlak hle.

Man United lamah Marcus Rashford-a'n a vanglai hun a hmang mek a, a khawih fuh apiang rangkachakah a chang ta tih mai tur a ni. Rashford hian tun season-ah goal 21 a khung tawh a, English striker dinhmun hi chu season pum aṭanga teh loin World Cup zawh aṭanga teh zawk tur a ni.

Kum 25 mi Rashford hian World Cup zawhah match 15 khel tawhin goal 13 leh assist vawi li a nei tawh a, goal khung lohna match ṭum thum chauh a nei. Barca tan Rashford ven uluk a ṭul dawn a, chutihrualin tun hnaiah Alejandro Garnacho a che ṭha viau bawk. Argentine rawlthar hian khelhna hmun a chang a nih chuan Man United goal nawrna tur pakhat a ni ngei ang.