Knockout playoff inkhel tur dang pasarih
Shakhtar vs Rennes
UEFA Cup group stage-ah 2005-06 khan club pahnih an inhmachhawn tawh a, match khat chauh khelh niin France-ah Shakhtar hi 1-0 in an chak. Tunah erawh kum 15 chuang a ral leh tawh a, hun a danglam tawh.
Russia ramin Ukraine a run avangin Ukrainian football season chu March-ah an ṭan leh dawn chauh. Igor Jovicevic kaihhruai Shakhtar hian kuminah match an la nei lo a, match fitness an nei ṭha lo. Rennes erawhin Shakhtar hmelma Dynamo Kyiv chu group stage-ah ṭum hnih ngawt an hneh.
Rennes hian August 31 aṭanga FIFA World Cup hma thleng hneh loh an nei lo. Mahse World Cup zawh hnuah erawh Ligue 1-ah vawi nga chak loin vawi thum an chak thung.
Ajax vs Union Berlin
Ajax hian UCL-ah Rangers ṭum hnih hneh mah se Napoli leh Liverpool te an ngam loh avangin UEL an khelh a ṭul phah. Player senior Daley Blind chuan, "Kan thlen tur chin kan thleng pha lo," tiin a sawi a, January-ah Bayern Munich a pan bawk.
Coach Alfred Schreuder pawh result ṭhat loh avangin January thla tawp khan a bang a, John Heitinga chuan season tawp thleng Ajax hi enkawl ang. Dutch club leh Union Berlin hi an vawi khat khelhna tur a ni.
German club Union Berlin hi Europe-ah an hming a langsar lo a, amaherawhchu tun season-ah erawh zuam chi an ni lo. Bundesliga-ah Berlin hi Bayern Munich elpui ber an ni.
Salzburg vs Roma
RB Salzburg leh Roma pawh hi an la inkhel ngai lo. Matthias Jaissle kaihhruai Salzburg hi UCL aṭanga tla ni mah se Roma lakah rinkai an ni bik lo.
Serie A club hi Jose Mourinho enkawl an ni a, season liam taah khan Europa Conference League-ah an champion. Mourinho hi nomawi chawi thiam bik an ni a, Porto (2002-03) leh Man United (Man United (2016/17) tan Europa League nomawi hi a chawi tawh a ni.
Juventus vs Nantes
Juventus-in Serie A an thununna kha a la rei lo a, tunah erawh UCL group stage pawh an paltlang thei lo. Juve leh an khingpui tur Nantes te hi 1995-96 season UCL semifinal-ah inhmachhawnin Turin club hian hnehna an chang a, final-ah Ajax hneh zuiin Europe-a an champion hnuhnun ber a ni.
Nantes boss Antoine Kombouare chuan, "Group stage paltlang kan duh a, kan paltlang tawh phawt. Khingpui ṭha tak kan duh a, kan duh ang kan hmu leh. Tunah chuan kan match tawp ber ang maia theihna zawng zawng nena khelh kan duh," tiin a sawi.
Sporting CP vs Midtjylland
2001-02 UEFA Cup first round-ah khan Sporting hian Midtjylland hi aggregate-ah 6-2 in an hneh tawh a, Brazilian forward Mario Jardel chu player langsar a ni.
UCL aṭanga tla Sporting hi chak tura rinkai zawk an ni a, Danish club Midtjylland tan kumin 2023-a competitive match hmasa ber a ni ang.
Leverkusen vs Monaco
Bayer Leverkusen leh Monaco inkhel tur hi en châkawm zinga mi an ni. Monaco hi league lama PSG hneh zo hlim an ni a, German forward Kevin Volland chuan a club hlui a hmachhawn dawn.
Champions League-ah chuan Monaco hi Leverkusen lakah an chungnung a, vawi ruk an inkhelhah vawi thum chakin vawi hnih an inhnehtawk. German club hi Liverpool midfielder hlui Xabi Alonso enkawl a ni a, match hmasa pasarihah vawi khat chauh chak mah se tun hnaiah erawh an insiamṭha hle.
Sevilla vs PSV Eindhoven
Sevilla-in season bul an ṭan ṭha lo a, coach Julen Lopetegui-a'n a hna a chan phah hial. Loepetegui thlaktu Jorge Sampaoli pawhin World Cup zawhah a ṭha danglam thlen a la harsat a, PSV nen hian inkhel tawk viau turah a ngaih theih.
PSV hian Europa League group stage-ah goal 15 an khung a, an khung tam ber. Dutch club enkawltu hi Man United goal khung khawl ni ṭhin Ruud van Nistelrooy kha a ni a, amaherawhchu PSV hian Liverpool lakah an player pawimawh Cody Gakpo an chan tih hriat a ṭha ang.