F1 champion nih tum Charles Leclerc

Ferrari hi Formula 1 team hlun leh ropui an ni, mahse tun hnaiah an ropui tawk lo - F1 champion an nih hnuhnung ber aṭanga chhiarin kum 16 a tling ta, an driver ṭha Charles Leclerc chuan kuminah champion theih a inbeisei.

Leclerc hi beiseina sang tak nena an lakluh kha a ni a, theihna pawh a nei sang. Season hmasa tir lamah khan Max Verstappen nen an inel tawk viau, mahse a rei hnuah erawh Red Bull driver a phak lo hle.

Season hmasa pahnihna Leclerc chuan, "Kan thil tum hmasa leh pawimawh chu hnehna chan a ni a, team ropui takin car ṭha leh hlu tak a neih hi a nihna anga hman chhuah leh kan tum ang.

"Nikum pawh khan nasa takin hma kan sawn, kuminah hian a aia nasa leh zualin hma kan sawn theih pawh ka beisei. Vawi khat che fuh hluai ringawt loin, season tluana chet ṭhat kan tum dawn a ni," tiin a sawi.

Thawhlehni khan Ferrari hian season thara an hman tur SF-23 chu an tlangzarh a, driver Leclerc hian car thlar chu khalhin, a teammate Carlos Sainz pawhin enchhina hun hi a nei bawk.

Ferrari driver zinga F1 champion ni thei hnuhnung ber chu Kimi Raikkonen kha niin, kum 2007 daih tawh kha a ni. Fernando Alonso khan 2010 leh 2012 khan nomawi chawi teuh viau mah se a hlawhtling ta lo.

Red Bull tana hlawhtling taka tlan Sebastian Vettel an lalut a, mahse an duh ang an hmu lo. Vettel hun chhung hian Mercerdes leh Lewis Hamilton an ngam thei lo, an inṭhen zui phah ta reng a ni.

Tun hnaiah Red Bull an rawn intuai thar leh a, season hnih chhung chu Max Verstappen-a'n ro a rel leh ta. Ferrari hian theihna sang tak nei mah se mi dang elphak nghal tur chuan a tir aṭanga a tawp thleng chet ṭhat a ngai ang.