Jeje-a'n boot a khai ta

Mizo footballer zinga thleng sang ber Jeje Lalpekhlua chuan nizan khan Hyve Aizawl City Hall-ah ṭhenrual ṭha, football hruaitu leh thuthar thehdarhtute hmaah football khelh a chawlhsan thu a puang.

Jeje hi Mizoram chauh ni loin India ram football-a hming langsar ni pha a ni a; India footballer ropui Bhaichung Bhutia, Sunil Chhetri leh IM Vijayan te huanga dah theih a ni hial.

Jeje thlahna chu

Jeje thlahna hun hi MFA executive committee member Hmingthansanga'n a kaihruai. Mizoram junior team vawi tam champion pui tawhtu Hmingsanga chuan, "Mizoram mai ni lo, India ram ang pawha hun chhinchhiah tlak, kawng leh lama sawi chuan hun lunglen thlak tak ni tur kan hmang dawn.

"Indian football a Mizoten kan pek hlu ber Jeje Lalpekhlua hi a hlu ngawt mai. Hlawhchhuah hlawhtlinna hlimawmzia hrechiangtu Jeje hi inkhel thiam, goal thun thei, a goal thun lawm a, India mipui nuai tam takte lungrual taka min lo au rual tir dual dual tawhtu a ni. Striker a ni a, a tihtur chu goal thun a ni, a hna hi a tlin zaih zaih hle. Mizo Sniper tih hming lem an vuah hi a phu a sin," tiin bul a ṭan a, a thusawi hian a fun kim hle.

Hnahthial pasalṭha

Jeje naupan lai aṭanga enkawltu Hnahthial DFA president H. Hmingthanzuala chuan a hun hmaa Jeje chawl chu a ui thu a sawi a, a theihnate Mizo tana hmang zel turin a chah.

Football hmangin Jeje hian India ram pum thlengin Mizoram hming a ṭha zawngin a lar tir a, Hnahthial pawhin an hmingṭhat phah hle. A thlahna hunah pawh hian Jeje-a pa F. Lalliankima, a ṭhianpa Lalrindika leh HDFA president Hmingthana te Hnahthial aṭangin an rawn kal a ni.

Mi bik chu

India ramah mipui tluklehdingawn khat chuang an awm a, footballer pawh an ṭhahnem hle. Chung zinga langsar zinga tel pha Jeje hi mi bik a ni a, chumi nemnghettu chu ram tana a goal khung zat hi a ni.

Jeje hian ram tan match 56-ah goal 23 a khung a; player pathum Sunil Chhetri (84 goals), I.M Vijayan (29) leh Bhaichung Bhutia (27) te chauh a tluk lo. Mizo striker hian India Under 19, Under 21 leh senior team tan captain hna a chelh vek thei vek. ISL club tan Asia ram inelnaa goal khung hmasa ber a ni bawk.

India rama football inelna sang ber ni ṭhin I League-ah Mohun Bagan a champion pui a, Mariners hi National Football League te chu champion tawh mah se Jeje hoa an champion hma hian I League-ah an la champion lo. Tun dinhmuna India rama football inelna sang ber Indian Super League-ah pawh Chennaiyin ṭum hnih a champion pui bawk.

Jeje hian ISL match 76-ah goal 24 a khung a, inhliam vanga a khelh mumal theih loh avangin record ṭha lehzual a hnutchhiah thei ta lo. Sunil Chhetri chuan match 130 aṭangin goal 53 a khung a, Indian player goal khung tam ber dawttu erawh Jeje ni tawh lo mah se Mizo tlangval tho a ni. Lallianzuala Chhangte chuan match 116 aṭangin goal 30 a khung.

A hun hma

India international hlui Jeje chuan, "Kum 2012 aṭang khan na chungin ka khel char char. Coach-ten khel tura min ngen chuan theihtawp ka chhuah mai ṭhin. Mahni lampang inngaihtuah lo khan min duhsakna kha tihhlawhtlinsak kan tum a, pain killer ei chungten ka khel ṭhin. Tunah erawh ka tawrh phah ta a, a hun hmain ka chawlh a ṭul ta a ni. Ṭhangthar zawkten hmalam hun ngaihtuah se, ka tawn ang hi tawng ve lo se ka duh," tiin Vanglaini a hrilh.

Jeje chuan sawi chhunzawmin, "Mihring duhnaah chuan a hun hmain ka chawlh thu hi ka puang ta mai a ni. Rilruin a la pha bawk si a, taksa lamin ka phak tawh si lo. Chutihrualin Pathian min hruainaah hian ka lawm, vuina tur ka nei lo.

"Kan kawt bang per aṭanga India team tana khel thei ka ni a, ka thlen chin hi keimahah chuan a ropui ka ti. Pathian vang lo chuan ka thleng thei lo. Chutihrualin Mizo mipuite beiseina ang ka tihhlawhtlinsak thei lo erawh pawi ka ti hle.

"Mizo mipuite hian min thlawp ṭha em em a, hmun hrang hrang aṭangin min ṭawngṭaisak thu min hrilh ṭhin. Hei hian ka inkhelh lai khan chakna nasa tak min pe ṭhin. Mizo mipuite chungah lawmthu ka sawi a, Mizoram tan ka theihna zawn zawnah theihtawp chhuah zel ka la tum," tiin a sawi.

Jeje an thlah

Jeje hi Mizoram sports minister Robert Romawia Royte, AIFF secretary general Dr. Shaji Prabhakaran, Pune FC CEO hlui Chirag Tanna, Chennaiyin FC neitu Abhishek Bachchan leh Vita Dani ten a thlahna thu an sawi.

Amah chher hriamtu Ari Benjamin LR Hmar bakah Mizo player langsar S. Malsawmtluanga, Robert Lalthla-muana, Lalrindika Ralte, Zohmingliana Ralte leh Lallianzuala Chhangte te bakah India tana a khelhpui ṭhin Sunil Chhetri, S. Malsawmtluanga, Eugeneson Lyngdoh, Gurpreet Singh, Sandesh Jhingan leh Gouramangi Singh ten 'video clip' tawi hmangin an thlah ve bawk.