Jeje Lalpekhlua chanchin chu

Mizoram chhim lama khawpui pakhat, Hnahthial khuaa Model Venga naupang dangte ang bawka khelmual remchang a awm loh pawha bang pet per dawp dawpa football khelh bul ṭanin, Jeje Lalpekhlua hian a football hun bul a tan a, Indian footballer zinga goal thun hnem lama palina a ni thei ang tih hi tumahin an ring kher lo ang.

Hnahthial khuaa football coaching mumal pawh chhim loa bul ṭan ve mai kha tunah chuan Sunil Chhetri, IM Vijayan leh Bhaichung Bhutia tih loh Indian footballer ropui dang zawngte aia goal khung hnemin, ram tan goal 23 a thun a, heng goal-te hi khelh 56 chhunga a thun vek a ni.

A naupanlai aṭangin infiam a thei hle a, boxing leh tennis-ah a thiam pawl tak niin Mizoram level intihsiaknaah pawh a chhuak zak zak a, badminton leh table tennis pawh a thiam hle a, volleyball thlengin a rualpui zinga a thiam pawl a ni. Football a khelh ṭanna pawh hi an inkawt leh an ṭhenawma volleyball court lamah a ni nghe nghe.

A pa F Liankima hi football leh infiamna dangah pawh an khaw chhehvela hming chher tak a ni phak a, a patea, F. Lianhmingthanga phei chu a hunlaia Mizoram footballer ṭha ber pawl a ni.

Hetiang chhungkuaa seilian a nih vang hi a ni ngei ang, football-a eizawn duhna hial a nei ta. A nu leh pate bulah football-a eizawn a duh thu sawi mah se pawl 10 a pass hma chu football-a kal a phalsak lo a, pawl 10 a pass hnuah football-a eizawnna kawng dap turin kum 2006 khan Aizawl a pan ta a ni.

Hetihlai hian Aizawl Venghnuaia cheng, Mizo striker ṭha ṭhin Ari Benjamin LR Hmar chuan football coach zir chhuak hlimin, football zirna a hawng a, hei hi Jeje pawh hian a rawn pan ve ta chat a ni.

Hun rei pawh a inzir hman lo, MFA buatsaih constituency hrang hrang inelna Wai Wai Cup chu kum 2006 khan khelh a ni a, hetah hian Hnahthial bial aiawha khel rawlthar Jeje Lalpekhlua chuan Mizoram hmelhriat a hlawh chho ṭan ta.

Mizoram Junior team-a khel tura koh a ni zui a, kum 2006-a Mizoram Under 19 team-a a awmlaiin Mizoram Football Association chuan AIFF aṭangin lehkha an dawng a, India Under 19 team-a trial tur player tir tura tih an ni a, MFA lam chuan Jeje leh a ṭhian dangte chu trial turin an tir thla a, hetihlaia India Junior team enkawltu English coach Colm Toal-a player duhzawng tak mai a lo ni a, India team-a tel turin thlan a ni.

Kum 2007-a Iran-a AFC Under 19 khel tur zingah thlan a ni a; nimahsela vanduaithlak takin a inhliam ta tlat mai a, zin ve thei lo tura a inngaihlai chuan an coach Colm Toal chuan a player duh em em mai Jeje chu inhliam chung pawha zin turin a ko mauh mai - hei hi a football nun kawnga thil pawimawh ber pakhat a ni nghe nghe.

Kum 2008 a ni a, India Under 19 team-ah hian awm zui zelin team captain-ah hial dah a ni a, a theihna hmutu hetihlaia India rama professional club changtlung bera chhal ngam Pune FC chuan an youth team-a awm turin an lalut a, he club tan hian Second Division I League-te khel chhoin I League thlengin a khel a, India-in a hmelhriat lehzual ta a ni.

Kum 2010-ah AIFF chuan Indian football hmasawnna a nih beiseiin India rama rawlthar thate la khawmin team a din a, a tirah AIFF XI tih a ni zet a, chumi hnuah Pailan Arrows tih niin tun hnua Indian Arrows ni zui ta hi a ni.

Hetihlaia India head coach Bob Houghton chuan India rawltharte chu I League-ah khel phak mang loin an awm a, hei vang hian hmun khata daha an inzirna tur buatsaih a rawt a, hei hi Jeje Lalpekhlua tana siam ni awma mawi a ni.

Pailan Arrows-ah hian Malsawmfela, Lalrindika Ralte leh Lalrozama Fanai te nen awmin India player ṭha an ni vek a, he team tana goal hmasa ber hi Sawmfela thun niin I League an khelh hnua an goal hmasa ber chu Didika thun a ni thung a, chutihlaiin Pailan Arrows hlawkpui ber chu Jeje hi a ni kan ti lo thei lo.

Pailan tan game 15 khelin goal 13 a thun a, March, 2011-a I League-a Air India an hmachhawn ṭumin Jeje hian goal 4 ngawt a khung a, he mi kum vek May thlaah club hlun tak Mohun Bagan an hmachhawn ṭumin goal li a thun leh bawk a, Football Players Association of India cuan Best Young Player Award an pe zui ta a ni.

Kum 2012-ah Pune FC lamah a kir leh a, a hlawhtlin chhoh zel avangin Indian club lianin an inchuh a, June 15, 2013-ah hetihlaia India rama club hlawhtling Dempo tana khel turin Goa a pan.

Dempo-a kum khat a khelh zawhah Kolkata club hlun Mohun Bagan chu 2014-ah a zawm a, I League leh Federation Cup-ah a champion-pui ve ve a ni.

Kum 2014-ah vek Indian Super League a lo piang a, player pakhatin I League leh ISL an khelh kawp theih lai niin Bagan leh Chennaiyin FC tan a khel kawp a, Indian Super League Emerging Player of the League hmasa berah thlan a ni a, chumi hnuah ISL history-a player ropui ber pawl a ni chho ta a ni.

Chennaiyin-ah hian kum ruk zet a cham a, ISL-ah goal 24 a thun a, he club hi ISL-ah vawi hnih a champion-pui a, an player pawimawh ber pakhat a ni zel. Club legend ti hiala chhal theih a ni.

Club lama a chet ṭhat avang hian ram tana kohna pawh a dawng hma hle a, kum 2011 February-ah India Under 23 tam-ah koh a ni a, a match hmasa berah Myanmar an hneh ṭumin goal a thun. India senior team-ah kohna a dawng zui a, March, 2011-ah AFC Challenge Cup qualifier-ah Chinese Taipei lakah a game hmasa ber khelin a goal hmasa ber a khung bawk a, a game hnihnaah Pakistan hmachhawnin goal hnih a thun leh a, India senior team-a a game hmasa pahnihah goal thum a khung nghal der.

India tan vawi 56 zet inlanin goal 23 a thun a, SAFF Championship-a champion team-ah vawi hnih a tel a, International Cup-ah ṭum hnih a champion bawk a - kum 2016 khan AIFF Player of the Year-ah thlan a ni.

Footballer ropui tak, kalkawng tluang tak niin lang mah se chutiang chu a ni vek bik hauh lo - footballer dangte ang bawkin inhliam vangin vawi duai lo a buai a, kum 2012 a Air India nen I league an khelh ṭumin a khup a ti na hlauh mai a. Ahunlai hian inenkawlnate tun angin a la ṭha tawk lo. Khup dam chiang lo chungin a football carrer tam zawk a lo hman phah ta a ni. Chennaiyin FC-a a season tawp ber 2019–20 phei chu vawi khatmah khelmualah a inlan lo - hun rei tak chhung amah tibuaitu a khup chu kum 2019-ah zai a ni.

A tirah chuan thla hnih thum vel chawl tura a inrin laiin a dam thei lawk lo a, 2019-2020 pum chu a inkhel thei ta lo.

A hliam a dam dawn emaw tih hnuah a dam fel hleithei lo a, hetihlai hian club tam takin an lo beisei ve reng bawk nen, 2020 khan East Bengal zawmin, ISL-a kir leh turin a inbuatsaih. Theihtawp chhuahin bei mah se a khup hliam hi a dam chiang thei lo a, a club thar tan vawi sarih chiah a inlan a, goal khat a thun.

Kum 2020-21 season a liam a, Jeje khup hliam erawh a liam ve mai thei ta tlat lo. A dam chian beiseiin a inenkawl reng a, vanduaithlak takin Covid-19 hripui a leng bawk nen a duhthalin a inenkawl thei lo. Amahin theihtawp a chhuah a, a chawlh hma ngeia India kawr haa inkhelh leh ngei a duh a, a tum a, a theih ngei a ring bawk a; nimahsela Jeje khup hliam hian dam chian ni reng a nei ta lo.

A hlawhtlin tirh aṭangin a pian chhuahna khua Hnahthial a theihnghilh ngai lo a, a sikul kalna ṭhinte fanga thilpekte hlana, a remchan ang apianga ṭanpuina sum leh pai pawh theh chhuak ṭhintu Jeje hian a hun tawp lamah Jeje Football Academy chu Hnahthialah a din a, a chhehvel khaw hrang hrangah leh Mizoram hmun dangah football zirna camp a buatsaih a, ṭhalai leh tleirawl zawkte fuihna thu sawiin an sawm awl lo a, hetih chhungzawng hian, "Vawi khat tal India tana goal thun leh ka la tum a ni," tiin a hliam avanga tlawm mai a tum lo.

Damdawi lam thiamte rawnin amahin a tih ve turte theihtawpa tichungin a bei zel a; nimahsela footballer tan khup hliam dam chiang lo chunga inkhelh zui zel theih a ni ta lo. Jeje Lalpekhlua chuan hreh tak chungin a nuna thutlukna harsa a tih ber siam a ngai ta a, "Kum 2023-ah hi chuan professional footballer ni zui zel thei ka ni tawh lo," tiin a football boot khai turin thutlukna a siam a ṭul ta a ni.

Mizo chhul chhuaka footballer hlawhtling ber, a khelh zat te, a goal thun zatte pawh Mizo tana record ropui, Indian football-a mimal leh team chawimawina zawng zawng dawng tawhtu chuan football khelh a chawlhsan ta - football erawh a la chawlhsan mai dawn lo. Mizoram football hmasawn zel theih nan theihtawp a chhuah tur thu Vanglaini a hrilh.