Arsenal hnehtu Man City an chungnung

Premier League champion lai Manchester City chuan an nomawi chuh buai mektu Arsenal chu Emirates Stadium-ah ngei mai 3-1 in an tukdawl a, point hmuh zat inangah Pep Guardiola naute hian goal difference nei ṭha zawkin an chungah an awm.

Gunners hian beisei phak bakin season an hmang ṭha, mahse tun hnaiah chesual zauh zauhin an elpui ber Citizens an ngam lo a, nikum November thla hnua a vawi khat nan Man City chuan hma an hruai chhawk ve leh ta a ni.

April 26, Nilaini zanlaiah Etihad Stadium-ah Arsenal hi an la lenglut ve thung dawn, league match hnuhnung vawi 10 chhung an hneh tawh Arsenal lo mikhual hi thil huphurhawm tak a ni hran lo ang.

Tihsual a pawi

Ben White aia bul ṭan tir Takehiro Tomiyasu-a back pass zawi hret a, a tihsual hrem turin Kevin de Bruyne rilru a fim avangin Belgian midfielder hian Aaron Ramsdale rawn tlan chhuah thlen hmain a lo pet khalh daih a, mawi zetin a pet khum a, a goal.

Man City an nghet bik lo, striker Eddie Nketiah pet chu goal line bulah lo dang mah se, keeper Ederson-a'n Nketiah a lo tih tluk avangin penalty a chawi a, a pettu Bukayo Saka tan harsatna a awm lo.

Arsenal defender Gabriel-a ball pass sual kal zelah Jack Grealish chuan an hmahruaina a khung a, hun tawp dawna Erling Haaland goal khung danah erawh Guardiola nauten team ṭha bik an nihna an lantir.

Pep-a thluak

Manchester City manager Pep Guardiola-a'n defender Nathan Ake chu a tir lamah a tlan chhuah tam tir a, mual sira player hlauhawm Saka ven hna chu Bernardo Silva kutah a tla hnem.

Silva hian Saka a veng hneh lo, ṭum li ngawt a tih tluknaah yellow card a hmu a, an khingpui goal hlauhawm pawh Saka lam aṭanga chhuak zel tia sawi theih a ni, mual hnung lam sira hmun ruak zau tak awm ṭhin chu Pep-a'n a hmuh hmaih lo.

Guardiola hian FA Cup-a goal khungtu Ake chu second half-ah a chhuah tam tir lo a, an tlarhnung a phui sawt. Tlarhnung a rem phui hmasa a ni satliah lo a, an khingpui phui tawk lohna lam a hre fuh chat.

Gabriel Martinelli leh Oleksandr Zinchenko te awmna lam a phui lo. Martinelli-a'n goal a nawr nat tawk loh bakah tlarhnung a pui ṭha tawk lo - Zinchenko a tlan chhuak fo bawk si, hetah tak hian Guardiola-a'n 'rusum' a thlak.

Arteta ruh a no

Guardiola-a'n Arsenal ṭhat tawk lohna lai a hmu fuh chat a, mualneitu Arsenal lam erawhin an phui tawk lohna lai an thawm nghal lo. Citizens lamin goal an nawr apiangin Zinchenko leh Martinelli te awmna lamah a ni deuh zel.

Mimal chauh ni loin a huhoin an nawr a, defender an nawr chiai fo. Gabriel-a'n ball a pass sual theih nan pressure an pe ṭha hle a, midfielder Ilkay Gundogan khan Grealish pet tura ball a dan fuh loh der dan a tawih hle.

Gabriel leh Haaland 'Fight' kha a hmuhnawm, penalty an chawi tur VAR hmanga hnawlsak an ni. Zinchenko-a'n team dang laka inringtawk tak chunga ball a khalh ang khan City lakah chuan a tih chi loh, a pawi thui teuh ṭhin hle.

Arteta khan goal an phurh hnuah Martinelli la chhuakin Lisandro Trossard a dah lut chauh a, se bo hnua se kawngkhar ang a ni. Khel ṭha lo Brazil international kha la chhuak hma se an ṭhatpui zawkin a rinawm.

Pep-a Man City

Khelmual pawn lamah boruak dang an neih avangin Manchester City hi an buai mai rinna pawh a awm, mah se tun hnaia buaina an nei chungin mual chhungah an buai phah chuang miah lo tih a takin kan hmu.

Defender ṭha ber zinga Joao Cancelo pawh chhuahtir ngamtu Guardiola hian a naute a hrechiang. De Bruyne, Silva leh Gundogan te inkawp aia midfield hlauhawm hi Premier League-ah an awm lo ang, an hnungah Rodri a la awm bawk.

English forward hmuhnawm Phil Foden te chu hun tawp dawnah an lut 'chauh' mai a, ani tel lo hian Grealish leh Riyad Mahrez te kha mual sirah an hlauhawm em em tho si. North London club ai chuan peng hrang hrangah player an 'quality' zawk.

League hmahruaitu an ni leh ta a, manager Guardiola erawh a la ṭawng fimkhur hle. Pep chuan, "Arsenal hian match khatin an khel tlem zawk. Chuvangin an dinhmun a la ṭha zawk niah ka ngai.

"A pawimawh lai chu hmanni lawk kha chuan Emirates Stadium-ah hian point kua vel laia hniam chunga lenglut thei kan ni, tunah erawh kan point hmuh a inzat, point an hloh karah keini lamin kan hmu hi a pawimawh.

"Premier League champion tur chu a tawp lam match 10 velah a hriat theih deuh ang, tunah chuan khelh hmabak 15 kan la nei," a ti a, league bakah Champions League an khelh tur chu danglamna siam thei a ni tih a sawi bawk.

Arteta-a Arsenal

Mike Arteta-a'n team a din a, chumi kawngah chuan Manchester City aṭanga a lakluh Gabriel Jesus chuan hmun pawimawh a chang. Mahse, Jesus hi hliam vangin World Cup hnuah an la chhawr thei lo.

Thlasik bazarah Eddie Nketiah elpui emaw, Jesus thlak tur emaw an lei thei lo. Manchester United laka a chet dan avangin Nketiah chungah beiseina a sang, mahse tun hnaia a hlah zo zai chhut chuan champion pui tham striker niin a lang lo.

Zinchenko hnen aṭanga ball ṭha bik a hmuh chu goal zawnah a tauh thei lo a, tlawh goal mai theih tura ngaih a tlawh hman lo bawk. Granit Xhaka hnen aṭanga a ball hmuh kha la dik ni se result danglam theihna tur a ni bawk.

A tawi zawnga sawiin, Arsenal lamin striker hriam tak an nei lo. Hliam vangin Thomas Partey an chhawr thei lo a, thlasik bazara lei Jorginho erawhin midfield a uap lum hneh viau thung.

Arteta chuan, "Point hmuh phu khawp chuan kan khelin ka hria, mahse kan danglamna chu box chhunga kan chet danah a ni," tiin a sawi a, a naute chuan insiamṭhatna tur lai la nei mah se an lakah beisei a nei.

Man City assistant manager a nih lai khan Arteta hian Arsenal laka an goal khung a lawm (celebrate) ngai lo. Gunners lamin Citizens laka an khung erawh nasa takin a lawm thung - KDB nen an in bakkaih zauh te kha Arsenal fans tan a hmuhnawm khawp ang.