Chelsea-in chak dan an theihnghilh!

Bazar hnem vanga ṭhat sawt tur chu ni se Chelsea el phak an awm kher lo ang - mahse, Chelsea hian January transfer-ah player pariat ngawt an lalut chungin, an beisei ang result an la nei thei lo.

Thlasik transfer khar a nih hnua chak la nei lo Chelsea hian Nilaini zan khan Champions League last 16 first leg-ah Borussia Dortmund an lenchilh a, khualmualah 1-0 in an tlawm.

Dortmund tan Karim Adeyemi chuan solo goal ropui a khung a, Chelsea-in a chhanletna tur an neih loh avangin 1-0 in an chak lo - second leg an la khelh dawn avangin hlauhthawn lutuk tur erawh a la ni lo.

Hmasawn Chelsea

Chelsea-in an fan-te beisei ang result la pe thei lo mah se, an khelh danah erawh hmasawnna hmuh tur a awm a, chutihrual chuan a pawimawh ber goal khung dan an zir thar a ngai - goal khung an harsat tlat.

Dortmund lakah pawh Atletico Madrid aṭanga loan hmanga an hawh Joao Felix a hmuhnawm takzet a, German club tlarhnung tan buaipui tham a tling. Mahse, a pawimawh ber goal a keng tel lo a, a chance neih chu uiawm taka a thlawh over bakah, bar a pet per bawk.

Reece James pawhin goal khungna remchang nei mah se Dortmund goalkeeper Gregor Kobel a paltlang thei lo a, Switzerland keeper hian vawi hnih ngawt chu ṭha zetin a dansak.

A tawpah Dortmund

Chelsea-in an chance neih chhawr theih loh an tuar a, Borussia Dortmund-in minute 63-naah Adeyemi hmangin an hrem - kum 21 mi forward hian counter attack aṭangin goal a khung.

Blues corner aṭanga ball kal chu Germany international hian chak taka tlanpuiin, pound maktaduai 106 man Enzo Fernandez a bum hnuah, Chelsea keeper Kepa Arrizabalaga bum lehin, goal a khung a, 1-0 a ni.

Chelsea hian nawr let mah se, Kalidou Koulibaly-a shot per aṭanga ball kal chu Emre Can chuan goal line aṭangin a lo pet chhuak a, Enzo-a'n hla tak aṭanga a shot chu Dortmund keeper Kobel chuan a dang bawk.

Chinfel ngai

Chelsea tan tlarhma buaina chinfel a ngai a, chance tam tak insiam chung sia goal an khung lo ṭhin chu buaina a ni - thlasik laia number 9 pangngai tak an lak loh an tuar tiin a sawi theih a, Graham Potter tan Pierre-Emerick Aubameyang rin ngam a hun ta, tihna a ni thei bawk.

Enzo leh Felix bakah Mykhailo Mudryk pawh a khel ṭha takzet a, mahse, goal a keng tel bik lo chu London club tan buaina a ni - goal khung an zir a ṭul.

Blues hian March 7 zanah last 16 second leg an khel dawn a, Stamford Bridge-ah goal khung ngei a ngai tawh - hemi hma hian Southampton, Tottenham Hotspur leh Leeds United an hmachhawn dawn a, league lama an buaina chinfel hmasak a ṭul ang.