Real Madrid an chak chiang

Spanish champion Real Madrid chuan nomawi humhim an la tum ve zel a, Nilaini zan khan La Liga inkhelah Elche chu 4-0 in an sawp - Karim Benzema chuan penalty hmanga goal hnih khungin, Marco Asensio leh Luka Modric ten goal khat ve ve an khung bawk.

Real tan Asensio chuan Elche defender a lam khum hnuah goal hmahruai a khung a, minute riatna chauh a ni - Benzema chuan penalty aṭangin vawi hnih a khung ve leh a, chawlhlawk hma hauhin 3-0 a ni der.

Hun tawp nan minute 10 chauh a awm tawh tihah Real tan Luka Modric chuan goal a khung ve leh a, 4-0 in Real an chak. Madrid khaw club hian table-a pahnihna dinhmun an luah chu an sawh nghet a, hmahruaitu Barcelona chu match 21 ve ve khelh tawhah point riatin an phak lo mek.

Real hian Inrinni zan dar 1:30-ah Osasuna an lenchilh zui dawn a, Barca-in Pathianni zan dar 1:30-ah Cadiz an mikhual thung ang.