Mumbai an tlawm ve ta

Indian Super League-ah match 18 zet tlawm nei loa an kaltluan hnuah Mumbai City an tlawm ve ta a, Nilaini zan khan Bengaluru FC chuan 2-1 in an lo hneh - league round champion ni chiang tawh team-in tlawm nei loa league round khar an tumna chu a tlawlh.

Kum 2023-a a vawi khat nana Bengaluru tana bul ṭantu Sunil Chhetri chuan minute 57-naah goal hmahruai khungin, Javi Hernandez chuan a belhchhah ve leh bawk a, minute 77-naa Mumbai tana Mourtada Fall goal khungin awmzia a nei phak lo.

Bengaluru hi an chak avangin table-ah palina an ni a, match sarih zet a zawna an chak tak avangin playoff khelh beiseina a sang ta hle - Sree Kanteerava Stadium-a inkhelah hian Lallianzuala Chhangte leh Lalengmawia Ralte (Apuia) te chuan Mumbai tan inkhel bul an ṭan a ni.