Chak mamawh Aizawl FC inlan dawn

Aizawl FC-in match hnih a zawna hnehna an chan hnuah, February 13 khan mahni mualah Roundglass Punjab chu 1-0 in an ngam lo a, table-ah paruknaah an awm.

Mizo club hi vawiin tlai dar 4:30-ah an inlan zui leh dawn a, Manipur club ṭha TRAU chu khualmualah an lenchilh dawn - Mizo club tan tlawm a thiang tawh lo.

Tun season I League-ah Aizawl FC hian match li khelh tur an la nei a, an hmabak match liah hian chak vek pawh ni se an champion thei tawh lo - an beisei san theih ber chu pathumna a ni.

Hmarchhak aṭanga I League champion hmasa ber tan hei hi a ṭha tawk lo a, vawiinah TRAU an hneh theih chuan Manipur club nen an point hmuh zat a inang chiah ang.

AIFF ruahman dan chuan tun season I League champion hian season tharah Indian Super League an khel dawn a, AFC an champion theih tawh loh avangin ISL-a Mizo club hmu tur chuan nghah hret a la ngai dawn tihna a ni.