Nou Camp-ah Ennawm Part I; Old Trafford-ah Ennawm Part II
Ningani zan khan Barcelona leh Manchester United ten Nou Camp-ah attacking football hmuhnawm an chhawp chhuak a, a khat mawi tawkin goal chance hmuh tur a awm rengin club pahnihin goal hnih ve ve an khung.
Europa League knockout playoff first leg-ah Catalan club-in Marcos Alonso tauh luh hmangin minute 50-naah goal an khung hmasa a, Marcus Rashford hmangin Man United-in minute hnuah siphurh an sut lehnghal.
Minute 59-naah Rashford-a hnathawh ṭhat vangin Jules Kounde-a'n an lamah a ti lut a, English club hi khualmualah chak thei dinhmunah ding mah se Raphinha hmangin mualneituin siphurh an sut. Ennawm hmuhnawmah hian 2-2 in inkhel a tawp.
A hmuhnawm thlawt
Manchester United-in Barcelona nen UCL final ṭum hnih an khelh ṭumin kawng tinrengah an ngam lo. Tun ṭumaah erawh team pahnihin goal khung an tum ve ve a, goal shot pawh vawi 18 ve ve neiin football hmuhnawm an pho chhuak.
First half-ah goal a lut lo a, goal chance a awm tho. David de Gea-a'n Robert Lewandowski goal khung tur a dang. Marc-Andre Ter Stegen-a'n United tana Wout Weghorst leh Marcus Rashford te goal khung tur a dang ve bawk.
Second half-ah goal li a lut a ni ringawt lo a, goal chance a tam lehzual. Rashford-a'n goal a khung bakah chance ṭha dang a hlah. Chutihrualin United midfield lai luah lumtu Casemiro-a'n anmahni goal ban a pet per.
De Gea leh Ter Stegen ten an hna an tlin. Lewy-a'n goal khung lo mah se Raphinha goal khung theih nan a inrawlh a, Old Trafford-ah pawh danglamna thlen theitu a ni ang. United tan Rashford a che ṭha a, Barca tlarhnung te pawhin dan ngaihna an hre lo.
Engtin zel?
Gavi chuan United counter attack tur tih tawp nan Fred a titlu a, yellow card a chawi avangin second leg a inlan dawn lo. First leg khel thei lo Sergio Busquets leh Ousmane Dembélé bakah inhliam thar lam Pedri thlengin an dinhmun a chiang lo.
Engpawh chu ni se, Catalan club hian Old Trafford an tlawh hmain Pathianni zan dar 1:30-ah Cadiz an mikhual phawt dawn. Man United pawhin Pathianni zan dar 7:30-ah Leicester City an khel ve dawn a, Casemiro hrem vangin a khel thei dawn lo. Chutihrualin Brazilian midfielder bakah hrem vanga first leg khel thei lo Lisandro Martinez leh Marcel Sabitzer te second leg-ah an inlan thei tawh ang.
Inkhel dang Pasarih
Juve an chelh
Turin-ah Juventus-in Dušan Vlahovic hmangin pet goal hmasa mah se Nantes-in Ludovic Blas hmangin second half-ah counter attack aṭangin an sut. Italian club hi UEFA coefficient ranking-ah French club aiin 109 laiin sang zawk mah se an inhnehtawk.
Juventus te inhnehtawk mah se Italian club hi an ṭha zawk a, an vanduai zawk mai a ni. Federico Chiesa chuan hun tawp lamah crossbar leh goal post a pet per.
Sporting an vannei
Sporting-in Danish club Midtjylland lakah beisei an pha lo hle. First half-ah goal a lut lo a, minute 77-naah Emam Ashour hmangin mikhual team-in goal an khung.
Midtjylland hian World Cup hnua competitive match hmasa ber an khel chungin chak an phu a, amaherawhchu Sporting captain Sebastian Coates chuan injury time-ah pawh minute linaah siphurh a sut. Portuguese club hian Europa League-ah an mualah match 36 khel tawhin vawi li chauh an la tlawm.
Shakhtar an chak
Russia ramin Ukraine a run avangin Shakhtar Donetsk-in inelna mumal khel thei lo mah se Rennes 2-1 in an hneh. Ukranian club tan hian Dmytro Kryskiv leh Artem Bondarenko ten first half-ah an khung.
Rennes hian Karl Toko Ekambi hmangin siphurh second half-ah siphurh sut ṭhen mah se inkhel result a danglam phah lo. French club hian tun season Europa League match rukah tlawm an nei lo a, match sarihnaah an chak lo ta thung.
Ajax = Union Berlin
Ajax leh Union Berlin te goal awm loin an inhnehtawk. Dutch club hian Amsterdam Arena-a an khel chungin minute 90 chhungin goal zawnah an pet lo.
Bundesliga-a season ṭha tak hmangtu Union Berlin erawh an khel ṭha a; Josip Juranovic freekick a goal teuh bakah Morten Thorsby goal khung chu VAR hmanga enlet a nih hnuah pawm a ni lo bawk. Ajax an vannei a, fiahna hautak zawk an la hmachhawn dawn.
Leverkusen 2-3 Monaco
Bayer Leverkusen leh Monaco inkhel a nung ṭha hle. German club keeper Lukas Hradecky-a'n an lamah ti goal mah se Leverkusen-in second half-ah Moussa Diaby leh Florian Wirtz te hmangin an lehthal. Talent nei ṭha Wirtz hian goal khung turin player pathum ngawt a bum.
Monaco an beidawng duh lo a, minute 74-naah Krepin Diatta hmanga siphurh an sut hnuah Axel Diasi-a'n injury time-ah ṭha takin a pet goal leh bawk. French club hian inelna hrang hrang match hnuhnung pasarih aṭangin goal 23 ngawt an khung.
Sevilla 3-0 PSV
Sevilla tan World Cup-a Morocco tana che ṭha Youssef En-Nesyri-a'n hmahruaina goal a khung a, first half-ah PSV lakah 1-0 in hma an hruai.
Second half-ah bench aṭangin Lucaos Ocampos a rawn lut a, ani hian minute 50-naah goal a khung bakah minute nga hnuah Nemaja Gudelj goal khung tur a siamsak leh bawk.
Mourinho naute an chak lo
Jose Mourinho kaihhruai AS Roma-in Austria-ah RB Salzburg an hmachhawn a, Tammy Abraham leh Andrea Belotti te hmangin hmahruai theihna nei mah se Salzburg keeper Philipp Kohn a che ṭha.
Minute 88-naah Nicolas Capaldo-a'n Salzburg tan a tauh lut a, Roma-in a sutna hun an nei ta lo. Roma hi UEFA Europa Conference League champion lai an ni a, UEFA hnuaia inelna match 34-ah a vawi khat nan goal an khung lo. Mourinho hote tana nomawi beiseina nei chhunzawm turin second leg-ah an lehthal a ṭul dawn a ni.