Champion 'Lai' leh Champion 'Tum' inlan hun

Premier League champion lai Manchester City chuan zanin dar 8:30 hian Notthingham Forest an lenchilh dawn, nomawi humhim an duh a nih chuan chetsual loh a pawimawh - Pep Guardiola naute hi chak tura rinkai an ni ang.

Zan dar 6:00-ah champion tum Arsenal chuan an manager hlui Unai Emery-a enkawl Aston Villa an tlawh dawn. Tun hnaia che fuh hleithei lo Gunners tan table hmahruaitu nih lailawk theihna remchang a ni, an chunga awm Citizens tana boruak siam an duh dawn.

Forest an buai

Tun season chhungin Nottingham Forest hian player 30 an lei tling, mahse thil mak tak mai chu tun dinhmunah tlarhnung laia chhawr tur an nei mumal lo! Forest manager Steve Cooper chuan Premier League hnenah Steve Cook ziah luh dilna a thlen hial.

Scott McKenna chu kar ruk a chawlh a ngai dawn, thla thum chawl tur Willy Boly a awm bawk. Defender dang Omar Richards, Moussa Niakhate leh Giulian Biancone te chu hliam vangin an chawl mek bawk a ni.

EPL lamin Forest dilna hi an phal leh phal loh kan hre hman lo, an phal lo a nih chuan defender pangngai Joe Worrall leh Felipe te chauh chhawr tur an nei dawn, an player neih dan chhut chuan Forest tan Man City hmachhawn a châkawm loh khawp ang.

Forest manager Cooper chuan, "Manchester City hi team ṭha an ni a, eng team pawh hmachhawn se inkhel thununtu an ni ṭhin, chuvangin tun ṭumah hian keini team chuan tihsual kan neih a thiang lo. Chutihrualin EPL-ah chuan hetiang inkhel hi a tam," a ti.

Ven ngai Haaland

Erling Haaland-a'n goal khung harsatna hmun tia sawi ṭhin Premier League harsatzia a hre lo emawni tih mai tur a ni a, season chanve lekah nikuma goal khung hnem ber a khum fel der tawh, zaninah pawh Notthingham tan ven ngai a ni dawn.

August thla khan Etihad Stadium-ah an inkhel a, hemi ṭum hian Haaland-a'n hattrick a siam. EPL-ah hian season khat chhunga team ngai laka vawi hnih hattrick siam thei hnuhnung chu Arsenal striker Emmanuel Adebayor (vs Derby in 2007-08) a ni. Haaland hian thei ve tak ang maw?

League goal 26 khung tawhtu Haaland hian Arsenal lakah a ke hmui a nei let leh tawh a, chuvangin Forest tan ven uluk a ngai ang. Cooper-a hote thlamuanna tur pakhat chu, anmahni khelmuala an league match hnuhnung pasarihah tlawm an nei lo.

Pep Guardiola-a'n kar leh maia RB Leipzig nen Champions League an khelh tur a ngaihtuah tel a ngai dawn. Spanish manager hian player a siksawi ang tih chu thil chiang a ni a, chutihrualin an squad-a awm player tu pawh hi lut se Forest tan chuan chai fe tam an ni vek ang.