Arsenal beiseina a la nung

"A hma aiin besei ka nei sang zawk," tiin Mikel Arteta chuan Manchester City an hneh loh hnu khan a sawi a, an elpui lakah chak lo mah se a naute khelh dan a hmuhin Premier League champion an nih theih ngei a beisei.

Gunners hian Man City lakah tihsual an neih zauh zauh an tuar. Spanish manager hian beisei la nei sang viau mah se an league match pathumah an chak zo lo vek a, season kal laia an chet fuh loh lai ber an tawng tih erawh zep theih a ni lo.

Everton leh Brentford nen an inhnehtawk hnuah Citizens an ngam lo a ni a, champion an duh a nih chuan Arteta naute tan Aston Villa lakah point hloh a remchang lo ang, an intlansiakpui Man City hian an nghak duhin a rinawm loh a ni.

Arsenal hmachhawn tur Villa hi Unai Emery enkawl an ni. Spanish manager hi tun hma deuh lawka Arsenal enkawl tawhtu kha a ni a, tuna team ṭha tak an neih theih nana sulsutu pawimawh zingah a tel, a team innghahna bulṭhut a hrechiang dawn.

Bukayo Saka, Gabriel Martinelli leh Emile Smith Rowe te hi Emery-a'n match hmasa ber khelhna hun a pekte an ni, tunah chuan North London club tana rinrawl an ni ta, anni ven dan hi a ngaihtuah a ngai dawn - Emery hian kawng a hre mai thei.

Emery chauh a ni lo, keeper Emiliano Martinez pawh hi inkhelh tam duh vanga Arsenal chhuahsantu a ni. Argentina tan a inkhelh phak phah a, tunah chuan World Cup hial a chawi tawh, zaninah Eddie Nketiah leh Saka te a lo hmachhawn dawn, a hmuhnawm khawp ang.