Chelsea an chak ve tawh ang em?

Nipui leh thlasik bazarah Chelsea-in player thar 17 ngawt an la a, an sum sen zat pawh pound maktaduai 600 bawr vel a ni. Blues hian sum ṭhahnem tak seng mah se chak an harsat a, match li chhung chu chak hmel an hmu tawh lo.

Zanin dar 8:30 hian Graham Potter-a hoten table mawngphaha awm Southampton an mikhual dawn a, Blues tan chakna hun ṭha a ni thei ang. Saints hian result ṭha an neih loh avangin Nathan Jones an ban a, a thlak nana an lak tum Leeds United ban hlim Jesse Marsch nena an inbiakna a tlawlh.

Blues an hmachhawn hunah hian Southamtpon hi first team coach Ruben Selles-a'n a enkawl dawn. Manager ban hlim club hian phur tharna an nei ṭhin a, chutihrualin Potter enkawl London club tan chhuanlam neih a thiang lo - an sum hman dan aṭanga tehin point thum an hlawhchhuah a ṭul.

London club hian kar laihawl khan UCL-ah Borussia Dortmund 1-0 in an hneh lo. UEFA danah kum tharah player pathum chauh Europe inelna hmachhawn turin inziahluh belh theih a ni a, hemi a nih avang hian Benoît Badiashile, Noni Madueke, Pierre-Emerick Aubameyang leh David Datro Fofana te chu UCL squad-ah an tel pha lo.

Chutihrualin hahdamna hun ṭha an neih avangin Premier League lamah an insawrbing thei thung ang. Graham Potter-a hote hian match hnuhnung paliah goal khat chiah an khung a, goal khung dan an theihnghilh. English manager hian tlarhma a tah hriam a ngai a, player a thlan dik a pawimawh dawn. Inrintawkna nei let turin Blues tan Saints hneh hi a pawimawh a, pressure an nei belhchhah dawn nge pressure a kiam ṭhen dawn tih chu a hriat thuai dawn e.