Chak lo Electric Vengin semifinal an lut

Hero Futsal Club Championship-ah Electric Vengin nimin khan group match hnuhnung berah Techtro Swades United FC an hmachhawn a, 8-5 in an an chak lo. Mizo club hi a suttu zawkah an ṭang zel a, minute khat pawh tling loah Techtro Swades United-in goal thum khung belhin hnehna an chang ta zawk.

Match commentator-in Electric Veng tlak thu a rawn sawi a, amaherawh-chu Vanglainiin a tarlan tawh angin Mizo club hian semifinal an lut tawh.

Semifinal an luh tawh avang tak hian Electric Veng hian an player pawimawh an hahdamtir a, player ṭha pathum ngawt squad-ah an dah lo.

Group A aṭangin khingpui zawng zawng hneh vektu Delhi FC-in semifinal an lut. Speed Force FC leh Electric Veng ten point 12 ve ve hmu mah se goal difference ni loa head to head en a nih avangin Mizo club-in knockout stage an lut.

Zanin dar 7:30 hian KD Jadhav Hall, Delhi-ah Electric Vengin semifinal an khel dawn. Mizo club hmachhawn tur hi group B hmahruaitu an ni a, he thuziah lai hian an khingpui tur kan hre hman lo.

Mohammedan SC, Minerva Academy leh Juggernaut FC (Ahmedabad) te pakhatna dinhmun an ni thei vek a, eng team pawh pakhatna ni se Mizo club tan a awlsam dawn lo.

Inkhel hi AIFF Youtube channel-ah a en theih ang.