Kan la tlawm bik lo - Mbappe

Paris khawpuiah ngei mai Paris Saint-Germain chuan Bayern Munich an hneh lo a nih kha. Mahse forward Kylian Mbappe chuan Champions League last 16 aṭangin an la tla bik lo tih a sawi - German champion an hmachhawn leh hmain a ṭha thei ang bera inbuatsaih an tum ngei ang.

France international Mbappe chuan, "1-0 in kan chak lo a ni mai a, attacking game pangngai kan khel thei a nih chuan Bayern Munich tan harsatna kan siam thei em em ang, khualmuala goal neih ringawtin awmzia a nei tawh lo.

"Tunah hian UCL aṭangin kan la tla lo, anni ang bawkin keini pawhin tlang turin hun ṭha kan la nei," a ti. Mbappe hi hliam vangin a tirah a inlan lo, bench aṭanga a luh hnuah goal khung mah se offside vanga hnawlsak a ni.

France champion hian tunah chuan Ligue 1 lam an ngaihtuah leh hmasak a ngai. Pathianni tlai dar 5:30 hian Lille an mikhual dawn, table-ah PSG hian point ngain hma an hruai mek a, an kal fal hleithei lo.

Bayern Munich hmachhawn leh tura inbuatsaihna ṭha ber chu Ligue 1 lama result neih ṭhat a ni. Chuvangin Bavarians an hmachhawn leh hmain Lille, Marseille leh Nantes te hneh an tum dawn a ni a, hna awlsam erawh a ni bik lo ang.