Conte-a'n team a la enkawl dawn rih lo

Antonio Conte chu a mit (gallbladder) zaina a la dam fel lo a, a taksa a dam chian hma chuan team enkawl hna a thawk dawn rih lo. Pathianni zan dar 10:00-a Tottenham Hotspur leh West Ham ten Premier League an khelh hunah, a naute a la ho thei dawn lo tihna a ni.

Tun thla tir khan Italy ramah Conte hi zai a ni a, kar hmasa khan Leicester City an ngam loh ṭumin mual sir aṭangin a naute a ho. AC Milan nen Champions League an khelh ṭum pawhin a inlan bawk.

Mahse, a ngaih awlsam ang aiin a taksain chawlh a lo mamawh. Instagram lamah Conte chuan, "Vanduai thlak takin ka ngaih awlsam ang ngawt a ni lo. Hmanhmawh taka zai ka nih avangin thil a nih tur phung anga kalpui vek a ni lo.

"Ngaiawh turin hun ka mamawh a, ka taksa enkawl uluk a ngai. Min hrechiang tute chuan hna thawk loa awm hrehawm ka tih turzia an hre chiang ang, mahse ka dam fel hma chuan ka chawlh rih a ngai ta zawk," tiin a sawi.

Tottenham chuan Conte hi engtiang chena rei nge a chawlh dawn tih an sawi lawk thei bik lo. West Ham bakah hian Chelsea, Sheffield United leh Wolves te chu an hmachhawn theih hnaivai zinga mi an ni.