Liverpool tan top four beiseina?

Season ṭantira champion sawi ri team khan tunah chuan Champions League khelh phak an sawi ngam ṭawk - mahse, kar hmasaa Everton an hneh hmaa an result thlir chuan top four sawi rik leh ringawt pawh hian Liverpool fan-te rilruah hahdamna a pe ang.

Reds hian zanin dar 11:00-ah Newcastle United chu khualmualah an lenchilh dawn a, hnehna an chan chuan palina dinhmun luah mektu Newcastle nen an inkarah point ruk chauh a awm dawn - match khatin an khel tlem zawk bawk.

A tawi zawnga sawi chuan, Champions League khelh beiseina nei thar leh turin Liverpool tan zaninah chak a ṭul a, Magpies an hneh a nih ngat chuan team an phur thar ang.

An phur thar

Tun season-a Everton khelh dan enin, Liverpool-in an hneh kha phur thar chiamna tur niin lang lo mah se Merseyside derby a ni a, Sean Dyche hnuaia Arsenal hneh hlim an ni bawk a, Reds tan Everton hneh kha result pawimawh a ni a, team boruak a ṭhat phah sawt bawk.

Roberto Firmino, Diogo Jota leh Virgil Van Dijk te an dam tawh a, rei tak goal a khung loh hnuah Mohamed Salah-a'n goal a khung a, Reds a pan hnua goal a khung lawk loh hnuah Cody Gakpo-a'n goal a khung ta bawk - Liverpool hlim vanglai tak a ni.

Anfield-a team pahnih intawn hmasak ṭumin Liverpool an chak a, mahse, injury time-a goal khung hmanga chak ve hram an ni - hemi hnua Premier League match 17 an khelhah Newcastle an tlawm leh tawh lo a, St. James' Park-ah hna a awlsam dawn lo.

Beiseina

Liverpool phur vanglai tak hmachhawn hi Magpies tan a châkawm lo ang tih a chiang a, an match khelh zui tur ngaihtuah phei chuan Newcastle boss Eddie Howe tan chuan lu thak lo pui hiahna tham a ni.

Magpies hian Februay 26 zanah League Cup final khel turin Manchester United an hmachhawn zui dawn a, chumi zawha an league match hmasa berah Manchester City an lenchilh ang!

Mahse, Howe-a'n player dah ṭhat tih lam a ngaihtuah lo a, English coach chuan, "Theihtawp chhuaha khelh hi keini chuan kan tih dan a ni mai a, hetiang ang game pawimawh, a bik takin top team ang lakah chuan 100% aia hniama khelh a thiang lo," a ti a, cup final vanga indahṭhat a tum lo.

Inlan tur

Reds tan Everton laka bench-a ṭhu VVD chuan bul a ṭan tawh a rinawm a, an tlarhnung a nghet sawt tura ngaih a ni - Joe Gomez, Andy Robertson leh Trent Alexander-Arnold te an ding ho thei ang a, Magpies tan a awlsam lo ang.

Kum 18 mi Stefan Bajcetic thiamzia inhrilh nawn a ngai lo - Jordan Henderson leh Fabinho te nen inkawp tura ngaih an ni a, tlarhmaah Salah, Darwin Nunez leh Gakpo ten an theihna anga an khel chhuak a nih chuan anni aia duhthlan tur bik an tam chuang lo.

Magpies tan Alexander Isak-a'n training a zawm leh tawh a, bul ṭan nan erawh a la hma hret mai thei - hrem vangin Bruno Guimaraes a la inlan thei dawn lo bawk a, a tel loa an league match hnuhnung pahnihah Magpies hian point chiah an hlawh chhuak - Reds tan Brazil international awm lo tur hi chanchin lawmawm a tling ang.