Benzema inhliam mah se contract thar a hnai
Real Madrid striker chhuanvawr Karim Benzema-a inhliam leh tawh a, French striker hi Spanish media-te chuan zanin dar 1:30-a Osasuna an lenchilh hunah a inlan thei dawn lo niin an sawi.
Benzema hian Nilaini zana 4-0 a Elche an hnehna inkhelah, penalty aṭangin goal hnih a khung a, mahse, kum 2023-a a vawi hnih nan a inhliam leh tawh - Benzema bakah hian midfielder Toni Kroos chuan damlohna avangin training a zawm lo bawk.
Real hian Thawhlehni zan dar 1:30-ah Champions League last 16 first leg khel turin Liverpool an lenchilh zui dawn a, Benzema leh Kroos hi an inlan thei lo a nih chuan Spanish champion tan a pawi thui thei ang.
Contract thar
Benzema hian a hliam chanchin karah chanchin dang a nei tel a, Radio Marca chuan Santiago Bernabeu-ah contract thar a ziak dawn niin an sawi.
Season hmasa khan Benzema hian Real tan La Liga leh Champions League nomawi a chawipui - inelna hrang hrangah match 46 khelin goal 44 a khungsak a, assist vawi 15 a
nei bawk.
French striker hian Ballon d'Or chawimawina a dawng hial a, mahse, tun season-ah erawh hliam vangin a inlan tam tawk lo - match 23 chiah a la khel a, heti chung hian goal 16 khungin, assist vawi li a nei tawh a, contract thar sawi rik a ni hi a awm viau.
A chhehvel
Tun hnaia France tana inkhelh a chawlhsan thu puangtu Benzema hian Santiago Bernabeu-ah June 30, 2023 thleng cham turin contract a la nei mek. Khawthlang media-te chuan Benzema hian Real president Florentino Perez chu inbiakna a neihpui a, contract thar ziah a remti niin an sawi.
Hetihruala hriat tel tur chu Real hian player kum tam tawh lamah, kum khat aia rei contract an zawrh ngai lo a, hei vang hian Benzema contract thar tur pawh hi kum khat bak a nih a rinawm lo.
Real boss Carlo Ancelotti chuan, "Benzema hian contract thar a ziak em, ka hre lo. Mahse, ka sawi nawn duh chu, kan club legend chu kan club-ah ngei a chawl tur a ni," a ti a, Benzema chelh a duh.
Hmabak chu
Real hian tun season-ah UEFA Super Cup leh Club World Cup nomawi an chawi tawh a, La Liga leh Copa del Rey lama an dinhmun erawh a chiang lo thung. Real hi league lamah pahnihna an ni mek a, hmahruaitu Barcelona chu point riatin an thlau mek.
Madrid khaw club hian zaninah Barca nena an inkar sawr zim an duh ang. Europa League lama Manchester United nena inhnehtawk hlim Barcelona chu Pathianni zanah an inlan dawn thung a, dar 1:30-ah Cadiz an mikhual dawn a ni.
Atletico Madrid-in champion beisei ngam chiah tawh lo mah se Champions League khelh erawh an la beisei a, Pathianni zan dar 11:00-ah anmahni ang thoa top four-a season khar tum Athletic Bilbao an mikhual ang.