ECL-ah Lazio an chak

European football-a club inelna ngaihhlut hlawh pathumna Europa Conference League knockout round playoff first leg chu Ningani zan khan khelh a ni a, club langsar inlan zingah Lazio chuan 1-0 in CFR Cluj an hneh.

Lazio tan Ciro Immobile chuan inkhela goal awmchhun a khung a, Italian club defender Patric chu Ermal Krasniqi laka a chet dan avangin minute 15-na lekah hnawhchhuah ni mah se, Lazio an chak ta tho a ni.

Serie A club langsar ni ṭhin Fiorentina pawhin hnehna hlado chham chungin Braga an hawsan a, Luka Jovic leh Arthur Cabral ten goal hnih ve ve khungin, Portuguese club hi 4-0 in an sawp.

Braga player Vitor Tormena chu minute 55-naah hnawhchhuah a ni a, Fiorentina hian a tam zawk an nih chu chhawr ṭangkaiin, second half-ah goal thum an khung a ni.

ECL knockout round playoff second leg hi February 23 zanah khelh leh tur a ni a, he round paltlang team chuan last 16-ah group stage-a pakhatnate chu an tum leh ang.