Ka duh ang chu ka la sawi zel ang - Hamilton

Formula 1 season tharah chuan driver ten chanchinbu hmaah an sawi leh sawi loh tur chin thliar tura tih a ni a, mahse world champion vawi sarih ni tawh Lewis Hamilton chuan ama duh ang a la sawi zel dawn.

Mercedes driver Hamilton chuan, "Engmahin ka sawi duh leh sawi tum sawi turin min dang thei lo ang. Infiamna hmang hian thil thleng pawimawh leh ṭangkai hrang hrang kan sawi chhuak thei.

"Khawvel hmun hran hranah kan zin kual a, chuvangin thu ṭha leh pawimawh kan thehdarh thei," tiin a sawi a, dan siam mah se a mimal ngaihdan chu ngawih pui a tum lo hle.

Tun hnaiah mihring dikna chanvo humhalh chungchangah thawm a lian, infiamna hrang hrangah pawh thlawpna emaw duh lohna lam emaw lantir a ni ṭhin. Hamilton ngei pawh hi F1 huanga hetiang lampang uar mi tak a ni.

Hamilton chuan, "Hremna a awm thei tih hre reng chuanga mahni duh ang ang sawi chu a atthlak mai thei, mahse kei chuan ka vei zawng chu ka sawi dawn. Tu pawh hian mahni duhzawng sawi turin zalenna kan nei," a ti.

Britain tlangval hian season tharah Mercedes car a khalh leh dawn. Mercedes hian tun hnai khan kumina an car hman tur Mercedes W14 an tlangzarh a, an car hi a dum hlang a ni ang.

Mercedes team boss Toto Wolff chuan, "Hmasawnna tam tak a awm turah ka ngai, Lewis Hamilton leh George Russell ten an khalh chhin a nga, chumi hnuah chuan hmasawn leh zualna tur lai pawh an la sawi thei ang," a ti.

Car intlansiakna sang ber Formula 1 season thar hi March 5 aṭangin tlan ṭan a ni dawn, intlansiak hmasa ber atan Sakhir tlankawngah Bahrain Grand Prix an tlan ang.