Goa mualah Chennaiyin an chak

Mizo striker chhuanvawr Jeje Lalpekhlua'n inkhelh a chawlhsan thu a puan zanah, a club khelh ṭhinna leh hming chherna Chennaiyin an chak a, khualmualah 2-1 in FC Goa an hneh.

Chennai club tan hian Kwame Karikari chuan minute 10-na lekah goal hmahruai a khung a, Noah Sadaoui hmangin Goa hian chhanglet mah se, Karikari bawkin minute 73-naah penalty aṭangin a khung leh a, 2-1 in Chennaiyin an chak.

Goa an tlawm avangin playoff khelh beiseina a chau sawt a, match khat chauh khelh tur neih tawhah top six-a awm chiang tur chuan chak mai bakah, ATK Mohun Bagan leh Odisha chetsual an chan tel a ngai ang - Chennaiyin lakah hian Ayush Chhetri chuan inkhel bul a ṭan.

Chennaiyin tan chhiarkawp danah chuan playoff khelh theihna dan a la awm a, mahse, South Indian club tana he thil thleng tur erawh chuan thilmak a thlen a ngai dawn thung a ni.

Ṭum dang ang lo takin, tun season ISL aṭang chuan playoff-ah team paruk an inlan dawn - tun dinhmunah Mumbai City FC, Hyderabad FC, Kerala Blasters leh Bagan chu playoff khel tura tling chiang tawh an ni a, hmun ruak dang pahnih hi Bagan, Goa leh Odisha ten an la inchuh mek.

Tun hnaia che ṭha tak Isak Vanlalruatfela khelhna Odisha hi nizan khan an inlan a, Jamshedpur FC nena an inkhel hi he thu buatsaih a nih lai hian result kan hre hman lo.