Mane-a'n training a zawm leh ta

Inhliam vanga FIFA World Cup pawh khel thei lo Sadio Mane chuan training a zawm leh ta a, Senegalese forward hi Bayern Munich-in PSG nen Allianz Arena-a Champions League second leg an khelh hunah a inlan theih a rinawm ta hle.

Kum 30 mi Mane hian senior team zingah training a la nei lo a, a hranpain training hi a la nei rih. Senegalese forward hian Bayern training-na hmun Sabener Strasse-ah fitness a khawih leh ṭan tawh a, chak takin a tlan leh thei tawh.

Ningani kha chuan Mane hian Under 19 goalkeeper Benjamin Ballis nen shooting practice an nei a, Liverpool aṭanga Bayern zawmtu forward hian Thawhṭanni aṭangin senior team training a zawm tura ngaih a ni.

Bayern Munich-in zanin hian Borussia Monchengladbach an mikhual dawn a, Mane a la khel thei dawn lo. Julian Nagelsmann-a hote hi an hnuai chiaha awm Union Berlin aiin point khat chauhin an hmu tam a, chetsual a thiang lo. Kar laihawl khan Union Berlin-in Ajax an chelh a, Dutch club aia an khelh ṭhat zawk bawk avangin Bavarians elpuitu club hi an hming lar lo mah se dah hniam nghawt a rem ta lo.