A chung berah Arsenal awm leh ta

Premier League table chung ber an in luah chhawk zak zak mai - Arsenal chuan Aston Villa 4-2 a hnehin an dinhmun ngai an luah a, an elpui Manchester City erawh Nottingham Forest nen 1-1 in an inhnehtawk thung.

Mikel Arteta naute hian match 23 aṭangin point 54 an hmu, anmahni aia khel hnem Man City aiin point hnihin an sang. Kar hmasa lawk kha chuan goal difference nei ṭha zawk Citizens an chungnung, nomawi inchuh boruak a sang zel dawn.

A tawpah Arsenal

Unai Emery-a'n a club hlui hmachhawn dan tur a dang chhuak ṭha viau, minute ngana lekah Ollie Watkins chuan amah vengtu defender paltlangin chiang zetin a khung a, mikhual lamin Bukayo Saka hmangin an sut thung.

Mahse, Philippe Coutinho, Watkins leh Emi Buendia te hmangin Villa an hlauhawm, counter attack an hmang thiam thei hle. Coutinho goal hmangin hma pawh an hruai nawn - a zawna match thum chak ni hmel hmu lo Gunners an buai.

Amaherawhchu, second half-ah Arteta-a'n kalphung a thlak, na lehzual zawka goal an nawr rah chhuah chhawrtu Oleksandr Zinchenko-a'n si phurh a sut, hun tawp dawnah Chelsea duh loh Jorginho thawh rah vangin hma an hruai bawk.

Jorginho-a'n hla tak aṭangin bar a pet per dawp a, ball sawt hian keeper Emi Martinez lu fuhin anmahni lamah a per lut. Argentine keeper hi corner an hmuhah rawn chhuak pheiin ball an hloh leh si, goal vengtu awm loah Gabriel Martinelli-a'n a khung belh.

Arteta chuan, "Match hnuhnung kan khelh aṭanga darkar 72 a liam hmain Villa kan hmachhawn leh a, minute nga lekah 1-0 in kan hnufual bawk. Chawlhlawk lai khan mimala chet ṭhat a pawimawh thu ka sawi, hetiang taka inrintawkna kan nei let hi ka lawm," a ti.

Pawm a harsa

Arsenal an chak tih hre sa chungin Manchester City an inlan a, manager Pep Guardiola-a'n Champions League khelh hmabak an nei chungin a player neih ṭhate bul a ṭantir, mual sira khel Riyad Mahrez aiah Phil Foden a lut thung.

Bernardo Silva-a'n yard 20 aṭangin goal mawi a khung a, goal dang erawh an khung belh thei lo. Defender an hliam nasat vanga buai Nottingham Forest an ṭang khawng ve tlat a, hun tawp dawnah Chris Wood hmangin si phurh an la sut zui.

Arsenal an hneh ṭum khan City hian ball possession 37% chauh an nei - Guardiola hnuaia ball an chan tlem ber ṭum a ni hial. Forest lakah erawh first half chhungin 84% teh meuh ball an chang, amaherawhchu Erling Haaland awmna team hian goal an khung thei tlat lo.

Kevin de Bruyne-a'n goal khung tumin ṭum sarih ngawt a pet a, mahse a hlawhtling lo vek. Season kal laiah point 15 zet an hloh ta, season hmasa tluan khan point 11 chauh an hloh, nomawi humhim tur chuan chetsual zauh zauh a remchang tawh lo mai thei.

Man City defender Kyle Walker chuan, "Point hnih kan hloh a ni, goal hmaah hun ṭha kan neih zozai kan khawhral kha a pawi. Mimalin tumah dem theih a ni lo, chutih rualin tun aia kan hriam lehzual zawk a ngai," a ti a, 1-0 a chak thei ni mah se goal an chhuah chu pawi a tih thu a sawi bawk.

"Arsenal lakah ropui takin hnehna kan chang a, tun ṭumah hian khami ai khan kan khel ṭha zawk, mahse player pakua ngawtin goal an ven avangin a harsa. First half-ah khan vannei ni ila chuan 3-0 tala hmahruai thei tur kan niah ka ngai.

Goal kan khung belh theih miau loh avangin a tawpah kan tuar, hun ṭha bik tam tak kan insiam chunga kan khung belh theih miau loh chuan a tih ngaihna dang a awm thei tawh chuang lo, kei pawhin sawi tur dang ka nei lo.

Hetiang ang match kan khelh zawh hi chuan, ka naute hnenah sawi tur dang a awm vak lo. Mahni inah haw ula, tui leh hahdam tak mu chungin kan match khelh hmabak tur ngaihtuah rawh u, ka ti mai ṭhin." - Pep Guardiola, Man City Manager