Liverpool beiseina a la thi lo

Merseyside derby-a an chak hnuah Liverpool an chak lehnghal a, Inrinni zan khan Newcastle United chu 2-0 in an hneh - Jurgen Klopp-a hnuaia Reds 'zia' tak tak kan hmu leh ṭan ta a, top four chu match khata khel tlem chungin point ruk chauhin an hlat tawh.

Liverpool lawmna belh-chhahtu chu goal khungtute an ni - Darwin Nunez chuan tawih zetin goal hmahruai a khung a, Cody Gakpo chuan Everton laka a khung hnuin Reds tana a goal hnihna a khung ve leh bawk.

St James' Park-a inkhelah Liverpool-in mikhual tlangnel zia an chhuah a, na takin Magpies an nawr reng. Minute 22-naah Newcastle goalkeeper Nick Pope a chesual zui a, Mohamed Salah-a'n Alisson-a ball thlawh luh a um lut lai chu lo tibuaiin, penalty box pawnah ball a man.

Referee Anthony Taylor tan duhthlan tur dang a awm lo - Pope a hnawt chhuak a, English keeper hian League Cup final-ah Manchester United a hmachhawn thei dawn lo. Thil mak tak erawh 2-0 a hnufual Magpies-in player kim loin an khel zui. Mahse, mak tak maiin, player tam zawk an nih hnuah Liverpool an hmuhnawm lo zawk!

Magpies-in chance an nei ve reng - Allan Saint-Maximin-a shot ṭha tak chu Alisson-a'n bar-ah a nam per a, Brazilian keeper hian Miguel Almiron leh Callum Wilson chance neih duhawm chu ṭha zetin a dang bawk a, Dan Burn chuan woodwork a tihper ve bawk.

Liverpool tlarhnung a la pherh reng tih a lang nawn a, chutihrual chuan Nunez, Salah leh Gakpo an khel ṭha a, Diogo Jota-a'n ngai a awh ṭan a, Virgil van Dijk a lo kir ta bawk. Reds tan lawmna tur a tam zawk.

Thawhlehni zan dar 1:30-ah Liverpool hian Champions League round of 16, first leg khel turin Real Madrid an mikhual dawn a, Real hmachhawn hmaa an chak thei hi an lawm khawp ang.

Klopp chuan, "Player 11 kan hmachhawn laia kan goal khungte kha a ṭha hle. Kan khel ṭha takzet. Mahse, 10 an nih khan kan buai deuh tlat a, chuti chung chuan second half-ah khan khung belhna remchang erawh kan nei," a ti.

German coach chuan sawi zawmin, "Kal tluan loh lai hi chuan theihtawp chhuah zel a ngai a, chutiang tak chuan kan ti a ni. Zep thu a awm lo - rei tak a zawnin kan chak zo lo tawh a, a hlimawm takzet a ni," a ti a, a hlim hle.