Mac McClung a dunk turu ber!

Basketball a nih tawh chuan NBA a langsar a, engkim mai hi NBA tan vek emaw tih mai tur a ni. Kumin NBA All-Star neihah erawh G-League lama khel Mac McClung chuan a dunk turu ber a, amah tluk reng an awm lo.

G-League hi National Basketball Association hnuaia league hniam zawk a ni. Inelna ngaihlut hlawh bera khel ni lo mah se American tlangval Mac McClung theihna sawi nep theih a ni lo, 6ft 2in 'chauh' a sang a nih avangin a thil tih hian mak tih a hlawh zual.

Mi pahnih an inkoki-chhuana, a chung zawka awmin a hnung lamah ball a keng. McClung hian an pahniha zuan khum pahin ball a la a, hnung zawngin basket-ah a khung. NBA player ni lo zingah Dunk Contest a pakhatna ni thei hmasa ber a ni hial.

Kum 24 mi McClung chuan, "Hetiang hun ṭha min petu NBA chungah ka lawm, tunah tan chuan ennawm chu a zo leh ta rih. Min la hmu leh zel duh a nih chuan ka lo kir leh ang," tiin a sawi.

McClung hian a hun tam zawk chu G-League lamah a hmang, season kal laia point neih hnem lamah 36-na a ni phak chauh, chawh rualin match khatah point 19 a nei phak, college lamah chuan Georgetown leh Texas Tech tan khel mah se club liante mit latu a ni phak lo.

Nikum khan Golden State Warriors chuan an ziak lut, mahse NBA regular season chunah Warriors tan a inlan phak miah lo, an chhawr duh tak lohah chuan GSW hian an chhuah zanlen a, tunah season kal laoah G-League club Delaware Blue Coats tan a khel.

Portland Trail Blazers guard Damian Lillard chuan 3-Point Contest lamah hnehna a lo chang ve thung, ani hian a title hmasa ber la tur hian final round bikah point 26 a nei a, Pacers guard pahnih Buddy Hield (25 points) leh Tyrese Haliburton (17) te a khum.

Tun hnaiah Larry Bird, Ray Allen, Paul Pierce, Dirk Nowitzki, Kyrie Irving, Stephen Curry leh Klay Thompson ten 3-Point Contest-ah hnehna an lo chang tawh a, tunah chuan NBA All Star zinga vawi sarih tel tawh Lillard hin a thleng ve ta a ni.