MSL 8 a hmuhnawm zel

Mizoram Super League champion lai Zarkawt BCA chuan an khingpui apiang an hneh chho zel, vawiin chawhnu dar 1:30 hian Mission Veng Hotshots nen an inhmachhawn leh dawn, inkhel a hmuhnawm khawp ang.

Inrinni khan R. Dengṭhuama Indoor Stadium, Mualpuiah BCA hian Bungkawn LB Associates chu 101-100 in an hneh, team thar laka hnehna chang tur hian vanneihna an mamawh, vawi hnih champion tawh Khatla TBL lakah vannei takin an chak tawh bawk.

BCA hi team ṭha tak ni mah se chesual thei an ni tih chu a lang, vawiina an khingpui tur Hotshots hian tualchhung player ṭha Lalrozama an nei a, an match hnuhnung bera point 36 neitu Christopher Galbreath Jr an nei bawk, zuam sual theih tur an ni.

BCA lakah vawi khat vanduai zauh mah se Khatla TBL an hmuhnawm chhunzawm. TBL hian an match hnuhnung pahnihah Tuikual South leh Mission Veng Hotshots te an hneh, heng inkhelah hian point 100 an nei tling ve ve, point neih an harsat lo hle.