Electric Veng tawpna semifinal

Hero Futsal Club Championship 2022-23-ah Electric Veng chuan semifinal an thleng a, Inrinni zan khan KD Jadhav Indoor Hall-ah final khel tur hi Minerva Punjab nen zawngin 13-8 in an chak lo.

Semifinal inkhel dangah Mohammedan Sporting club chuan champion lai Delhi Football Club chu 7-6 in an hneh ve bawk. Final hi nizana khelh tura ruahman a ni a, result kan hre hman lo.

Minerva Punjab leh Electric Veng inkhelh ṭum hian nikuma Delhi FC champion puitu Nikhil Mali a che ropui a, Aizawl FC player hlui hian goal nga ngawt a khung. Mizo club-in bul an ṭan ṭha lo a, Punjab club hian minute 13 lek chhungin 4-0 in hma an hruai hman.

Electric Vengin theihtawp chhuahin an bei let a, 6-5 te ni hman leh mah se bul an ṭan ṭhat loh an tuar a, a tawpa an chak lohna chu 13-8 a ni.

Hun tawp hmain buaina a chhuak a, Minerva player Joel Beckham Simon chuan a goal khung lawm nan Mizo club tham lo takin a lam khum. Joel hian red card a hmuh hnuah Electric Veng technical area lamin panin Mizo player hnek a tum a, a hnek ṭhelh. Hetah tak hian Mizo player-ten an khawih let ve nghal.

Inkhelh zawh tawh hnuah inremna awm theih mai beisei mah se Minerva lamin FIR an thehlut a, khelmual pawnah buaina a awm chhunzawm. Nimin thleng kha chuan buaina hi chinfel a la ni lo.