Vanneihnain Chelsea a kalsan

Chelsea-in result ṭha duhin nipui leh thlasik bazarah player 17 lakluh nan pound maktaduai 600 bawr vel an seng a, beiseina sang tak nei mah se an sum hman tam hian 'pressure' a ken tel avangin vanneihnain a kalsan rih.

Graham Potter hote hian manager nei lo leh table mawngphaha awm Southamtpon chu Stamford Bridge-ah an mikhual a, Blues hian Saints lakah goal an khung thei lo. Mikhual team erawhin captain James Ward-Prowse freekick mawi zet hmangin goal an khung a, 1-0 in an chak.

Freekick pet thiam

Southampton-in Nathan Jones an ban avangin assistant manager Rubén Sellés-a'n team enkawl hna a chhunzawm. Match li chhunga goal khat chauh khungtu Chelsea tan erawh tlarhma tuai hriamna remchang a ni.

Mahse, Saints-in bul an ṭan ṭha zawk. Benoît Badiashile tihsual vangin Saints forward Kamaldeen Sulemana-a'n chance a nei a, a ball pet chu keeper Kepa-a'n a dan sak hnuin Stuart Armstrong-a'n goal-ah pet lehnghalin Kalidou Koulibaly-a'n a dang hman.

Blues-in beisei an pha lo a, Saints erawhin minute 45-naah Ward-Prowse-a freekick mawi zet hmangin hma an hruai thung. Ward-Prowse hian Premier League-ah goal 46 khung tawh a, heng zinga goal 17 hi freekick aṭangin a ni. Freekick aṭanga khung tam lamah David Beckham (18) chiah a pha tawh lo.

Vanduaina chu

Second half-ah Raheem Sterling leh Wesley Fofana te an lut nghal a, a hnu lawkah Kai Havertz leh Mykhalo Mudryk e an luh leh bawk. Chelsea goal bawh a na sawt a, amaherawhchu vanneihna an keng tel lo.

Kai Havertz-a ball pass ṭha zet chu Sterling tan awlsam taka khung theih niin lang mah se English forward hian Saints defender a pet per. Hemi hnu hian Havertz-a cross ball chu Sterling-a'n keeper awm lohna goal-ah tauh goal thei lo - defender Romain Perraud-a'n goalline-ah a lo dang.

Blues hian Conor Gallagher leh Mudryk te hmangin Saints rum ṭhaih leh mah se goal an khung thei lo. Goal hmaah Chelsea an vanduai a, an mualah table mawngphaha awm an mikhual chungin point an hlawh chhuak lo.

Engtin zel?

Chelsea captain Cesar Azpilicueta chu Saints forward Sekou Mara-a'n back volley chunga a luah a pet avangin zawn chhuah a ngai a, Spainish defender hi damdawi inah a rawn ṭawng leh theih avangin ngaihtuah awm a ni lo.

Blues hian chanchin ṭha lo karah thu lawmawm hriat tur nei mah se table-a an dinhmun erawh a ṭha lo chhunzawm zel. Khawtlang media lam chuan Chelsea thuneituten Graham Potter an la rin thu an tarlang a, amaherawhchu result ṭha a neih ran loh chuan rinna nghah reng harsa ang.

Chelsea hian February 26, Thawhlehni hian Tottenham an tlawh dawn a, Antonio Conte hote laka an khelh dan hian Potter-a hmalam hun pawh thui tak a hril ang.