Bayern an chak lo, Bundesliga boruak a 'hot'

Kum 11 chhung a zawnin Bayern Munich-in Bundesliga nomawi an chawi tawh a, Bavarians hi German club dangin an el tawk ṭhin lo. Tun season-ah erawh Julian Nagelsmann hoten beisei an pha lo a, champion tur a chiang lo. Inrinni zan khan Bayern-in khualmualah Borussia M'gladbach chu 3-2 in an hneh lo. Nizan inkhelah Union Berlin-in Schalke 04 an hneh a nih chuan Bavarians zuan khumin hmahruaitu thar an ni ang.

Borussia Park-ah Bayern defender Dayot Upamecano chu minute riatna lekah hnawhchhuah a ni a, mualneitu lamin Lars Stindl hmangin hma an hruai zui bawk. Bayern hian player 10-a khel chungin Eric Maxim Choupo-Moting hmangin first half-ah siphurh sut ṭhen mah se an ṭang tluan thei lo. Gladbach tan Jonas Hofmann leh Marcus Thuram ten second half-ah an khung belh.

Red Card

Julian Nagelsmann-a'n Bayern a enkawl hnuah Gladbach hi a la hneh ngai lo a, tun ṭumah pawh hian bul an ṭan fuh lo. Umpamecano leh Alassane Pléa ten ball an um dun a, box pawnah chiah Bayern defender hian Gladbach forward hi a titlu. Referee-in thutlukna dik siamin minute riatna lekah French defender hi a hnawt chuak.

Gladbach hian freekcik hmang ṭangkai lo mah se minute nga hnuah mual dinglama an freekick hmuh an hmang ṭangkai. Germany international Hofmann chuan vawrh lut loin box pawna awm Stindl a pe a, ani hian goal kilah kawh zetin a pet lut. Nagelsmann-a'n khelh dan a thlak nghal a, Thomas Muller la chhuakin Joao Cancelo a luhtir.

Chak phu zawk

Bayern-in tlem zawk mah se Alphonso Davies tlan chakna an hmang ṭangkai a, minute 35-naah Canadian wing back cross ṭha zet chu Eric Maxim Choupo-Moting-a'n siphurh sut nan a hmang.

Bavarians-in tlem zawk chunga khel chungin chak an tum a, an tisual. Minute 55-naah Plea-a ball pek chu Hofmann-a'n a ti goal a, inkhel an thunun theih nan ball siam thiam Julian Weigl an dah lut nghal bawk.

Glabach-in ball an chang tam a, Hofmann-a thawhrah sengin Marcus Thuram-a'n minute 84-naah a khung belh. Norwich coach hlui Daniel Farke hote hi awlsam taka chak thei tur an ni a, mahse defender tihsual vangin Mathys Tel-a'n siphurh a sut ṭhen. Bayern hian goal dang erawh an khung belh tawh lo. Tel hi kum 17 mi chauh a ni a, tun season-ah match 13 khel tawhin goal li a khung tawh - hmabak a nei êng hle.

Bayern hi tun season-ah vawi hnih chauh la chak lo mah se vawi sarih ngawt an khingpui nen an inhnehtawk a, an chetsual ngun deuh avangin nomawi humhim a harsa dawn.