I League-ah Sreenidi-in hma an hruai zel

Mizo tlangval R. Lalbiakliana'n Sreenidi Decanna lakah Sudeva Delhi tana hmahruaina goal khung mah se awmzia a nei lo a, Pathianni khan I League hmahruaitu lakah 3-1 in an tlawm.

Aibawk rawlthar Biaktea'n goal a khung hian minute 29-na chauh a ni a, Sreenidi lam hian hun rei tak chhung an chhanlet theih loh avangin Sudeva hi an chak mai dawn niin a lang hman.

Mahse, David Castaneda Munoz chuan minute 71-naah si phurh a rawn sut a, Ogana Louis chuan minute 80 hnuah goal rawn khung bawkin, 3-1 in Sreenidi an chak a, I League-ah hma an hruai chhunzawm.

Sreenidi tan Mizo player zingah Lalromawia'n inkhel bul ṭanin, Ramhlunchhunga chu bench aṭangin a lut bawk - Sudeva tan Biakliana'n bul ṭanin, Odisha FC aṭanga loan-a an hawh Lalhrezuala Sailung chu bench aṭangin a lut bawk a ni.

Inrinni khan inkhel pahnih awmin, Real Kashmir FC chuan 3-2 in Mohammedan Sporting Club an hneh. Kashmir tan Samuel Kynshi chuan goal hnih khungin, Ernest Boateng-a'n goal khat a khung a, Mohammedan tana Mirlan Murzaev leh Christy Davis te goal khungin awmzia a nei phak lo.

Kashmir tan midfielder Lalnuntluanga Bawitlung chuan bul ṭanin, Mohammedan tan defender Sairuatkima'n inkhel bul a ṭan thung.

Inrinni inkhel dangah Kenkre FC leh Rajasthan United te goal khung loin an inhnehtawk a, Kenkre tan Lalhmangaihsanga (Papuia) chu bench aṭanga lutin, Rajasthan tan midfielder Lalliansanga Renthlei leh Vanlalzahawma ten bul an ṭan - F. Lalremsanga chu bench aṭangin a lut bawk.